भिवंडी, ता. २ (वार्ताहर) : शहरातील अनधिकृत व धोकादायक इमारतींच्या दुर्घटनांचा इतिहास पाहता यापुढे अनधिकृत बांधकामांवर नियमित कारवाई सुरू राहील, असे प्रतिपादन भिवंडी महापालिका आयुक्त अनमोल सागर यांनी केले आहे. अनधिकृत बांधकाम व त्यावरील कारवाईचा आढावा घेण्यासाठी पालिका मुख्यालय इमारतीत प्रभाग समिट क्रमांक एक ते पाच अंतर्गत कार्यरत बीट निरीक्षक तथा सहाय्यक पदनिर्देशित अधिकाऱ्यांच्या आढावा बैठकीत ते बोलत होते. आढावा बैठकीला उपायुक्त विक्रम दराडे, अनधिकृत बांधकाम अतिक्रमण नियंत्रण अधिकारी अरविंद घुगरे, सर्व बीट निरीक्षक उपस्थित होते.
आयुक्त अनमोल सागर यांनी बैठकीत शहरात सुरू असलेल्या अनधिकृत बांधकामांसंदर्भात तीव्र नाराजी व्यक्त केली. मुंबई उच्च न्यायालयातील सुमोटो याचिकेबाबत २६ फेब्रुवारी २०२२ च्या न्याय निर्णयाचे काटेकोरपणे पालन करून आतापर्यंत २९१ अनधिकृत बांधकामांवर कारवाईचे निर्देश दिल्याचे आयुक्तांनी सांगितले. त्यानुसार दर महिन्याला प्रत्येक प्रभागात किमान दोन अनधिकृत बांधकामांवर निष्कासनाची कारवाईचे निर्देश सर्व बीट निरीक्षकांना दिले आहेत. यासाठी प्रभागात बिट निरीक्षकांना सहाय्य करण्यासाठी अतिरिक्त मनुष्यबळ उपलब्ध करून देण्यात येईल, असे स्पष्ट केले. यापुढे कोणतेही अनधिकृत बांधकाम होणार नाही; तसेच सुरू असलेली कामे तातडीने थांबवून त्यावर निष्कासनाची कारवाई संबंधित अधिकाऱ्यांनी करावी, असा इशारा आयुक्तांनी दिला.

नियमबाह्य बांधकामांवर आयुक्तांचे कडक आदेश
बैठकीत यापूर्वी झालेली काही बांधकामे नियमित करता येत असतील, तर नियमानुसार दंड आकारून ती नियमित करण्याचा प्रस्ताव सहाय्यक संचालक, नगररचना विभाग यांच्याकडे सादर करण्याबाबत आयुक्तांनी मार्गदर्शन केले. अनधिकृत बांधकामे व धोकादायक इमारती हटविताना, वेळोवेळी दिलेल्या सूचनांनुसार पोलिस विभागाशी समन्वय साधून आवश्यक पोलिस बंदोबस्ताचे नियोजन करावे, असे निर्देशही त्यांनी दिले. प्रभाग स्तरावर अनधिकृत व धोकादायक इमारतींवर करण्यात येणाऱ्या कारवाईचा साप्ताहिक अहवाल सादर करण्याचे आदेश देण्यात आले. या सर्व कारवायांवर अनधिकृत बांधकाम व अतिक्रमण विभागाचे उपायुक्त विक्रम दराडे यांनी नियंत्रण ठेवावे व त्याचा वेळोवेळी आढावा घ्यावा, असे आदेशही आयुक्त अनमोल सागर यांनी यावेळी दिले.