भिवंडी, ता. २ (वार्ताहर) : भिवंडी-वाडा रस्त्यावरील खड्ड्यात दुचाकी घसरून झालेल्या अपघातात १८ वर्षीय यश मोरे या युवकाचा मृत्यू झाला. या दुर्घटनेला सार्वजनिक बांधकाम विभागाचे अधिकारी आणि रस्ता दुरुस्तीचे ठेकेदार जबाबदार असल्याचा आरोप करत यशचे वडील राजेश मोरे यांनी या दोघांविरोधात सदोष मनुष्यवधाचा गुन्हा दाखल करण्याची मागणी सरकारकडे केली आहे.
सार्वजनिक बांधकाम विभागाचे अधिकारी कार्यालयात बसून रस्त्याची पाहणी न करता फाईलवर सह्या करून ठेकेदारांची बिले अदा करत आहेत. त्यांना या रस्त्यावर मरणाऱ्यांची काळजी नाही. ज्या वेळेस ठेकेदार व अधिकाऱ्यांच्या घरात असा अपघात होईल, त्यानंतरच त्यांचे डोळे उघडणार का? असा संतप्त सवाल मोरे यांनी व्यक्त केला. भिवंडी-वाडा रस्त्यावरील खड्ड्यात दुचाकी आदळून झालेल्या अपघातात यशचा उपचारादरम्यान बुधवारी मृत्यू झाला. त्यानंतर संतप्त ग्रामस्थांनी रस्त्यावर रास्ता रोको आंदोलन केले. या वेळी पोलिस प्रशासनाने गुन्हा दाखल करण्याचे आश्वासन दिल्यानंतर आंदोलन मागे घेण्यात आले आणि अंत्यसंस्कार करण्यात आले. या घटनेने परिसरात सार्वजनिक बांधकाम विभाग व रस्ता दुरुस्त करणाऱ्या ठेकेदारांविरोधात तीव्र संताप पसरला आहे.

बहिणीची भावनिक प्रतिक्रिया
सार्वजनिक बांधकाम विभागाचे अधिकारी व ठेकेदारांच्या हलगर्जीपणामुळे आज माझा भाऊ आमच्यातून निघून गेला. ९ ऑगस्टला रक्षाबंधन आहे. आता मी कोणाला राखी बांधणार, अशी मन हेलावणारी भावनिक प्रतिक्रिया यशची बहीण राजश्री हिने दिली आहे. यशच्या निधनाने मोरे परिवारावर दुःखाचा डोंगर कोसळला आहे.