भिवंडी, ता. २ (वार्ताहर) : भिवंडी गुन्हे शाखेने गैबीनगरमध्ये कारवाई करत तीन लाख ७५ हजार रुपये किमतीचा प्रतिबंधित कफ सिरप साठा जप्त केला आहे. याप्रकरणी दोघांना अटक करण्यात आली आहे. अश्पाक अहमद मोहम्मद हसन मोमीन (३९) आणि अब्दुलरजा अलीरजा सिद्धिकी (२५) अशी अटक आरोपींची नावे आहेत.
गुन्हे शाखेचे वरिष्ठ पोलिस निरीक्षक जनार्दन सोनवणे यांना गैबीनगर परिसरात मोठ्या प्रमाणात प्रतिबंधित कफ सिरप साठा विक्रीसाठी आणल्याची गोपनीय माहिती मिळाली होती. त्यांच्या मार्गदर्शनाखाली सहाय्यक पोलिस निरीक्षक श्रीराज माळी यांच्या नेतृत्वाखाली सहाय्यक पोलिस निरीक्षक मिथुन भोईर, पोलिस उपनिरीक्षक रवींद्र पाटील, सुधाकर चौधरी, सुनील साळुंखे, सुदेश घाग, साबीर शेख, शशिकांत यादव, प्रशांत राणे, वामन भोईर, साबिर शेख, अमोल इंगळे, भावेश घरत, विजय कुंभार, रवींद्र साळुंखे आदींच्या पथकाने बुधवारी रात्री गुलजारनगर येथे छापा टाकला. या कारवाईत प्रतिबंधित कफ सिरपच्या १९२० बाटल्या तीन लाख ७४ हजार ४०० रुपयांचा साठा जप्त करण्यात आला. आरोपींविरुद्ध शांतीनगर पोलिस ठाण्यात गुन्हा दाखल केला असून पुढील तपास सुरू आहे.