भिवंडी, ता. २ (वार्ताहर) : घरफोडी व चोरीचे गुन्हे करणाऱ्या सराईत गुन्हेगाराला भिवंडी गुन्हे शाखेने अटक केली आहे. त्याच्याकडून नऊ गुन्ह्यांची उकल करण्यात आली आहे. आकाश ऊर्फ चिन्या शशिकांत जाधव (वय २५) असे अटक आरोपीचे नाव आहे.
नारपोली पोलिस ठाण्यात दाखल गुन्ह्याच्या समांतर तपासात गुन्हे शाखेचे वरिष्ठ पोलिस निरीक्षक जनार्दन सोनवणे यांच्या मार्गदर्शनाखाली सहाय्यक पोलिस निरीक्षक श्रीराज माळी, मिथुन भोईर, पोलिस उपनिरीक्षक रवींद्र पाटील आणि त्यांच्या पथकाने तपास सुरू केला. घटनास्थळावरील सीसीटीव्ही फुटेज आणि तांत्रिक विश्लेषणाच्या आधारे आरोपीला अटक करण्यात आली. चौकशीत आरोपीने नारपोलीतील पाच, भिवंडी शहरातील दोन, निजामपूर आणि शांतीनगर येथील प्रत्येकी एक अशा एकूण नऊ घरफोडीचे गुन्हे केल्याची कबुली दिली. त्याच्याकडून ५८ ग्रॅम सोन्याचे दागिने आणि रोख मिळून पाच लाख ९८ हजार रुपयांचा मुद्देमाल हस्तगत करण्यात आला आहे. या कारवाईत पो.क. शशिकांत यादव, प्रशांत राणे, अमोल इंगळे, भावेश घरत, विजय कुंभार, माया डोंगरे आदींचा सहभाग होता.