रा. स्व. संघाचा विचार फुटीरतावादी
काँग्रेसविरोधातील मोर्चावरून प्रदेशाध्यक्षांचा टोला
सकाळ वृत्तसेवा
मुंबई, ता. २ : काँग्रेसचा विचार हा पाकिस्तानचे दोन तुकडे करणारा आहे, तर भाजप व राष्‍ट्रीय स्वयंसेवक संघाचा विचार हा पाकिस्तान निर्मितीच्या विचाराला पाठबळ देणारा आहे. मुस्लीम लीगच्या सरकारमध्ये भाजप नेते श्यामाप्रसाद मुखर्जी उपमुख्यमंत्री होते. त्यामुळे शिंदेंच्या शिवसेनेला मोर्चाच काढायचा तर तो फडणविसांच्या बंगल्यावर काढावा, असा टोला काँग्रेस प्रदेशाध्यक्ष हर्षवर्धन सपकाळ यांनी लगावला.

एकनाथ शिंदे यांची शिवसेना व भाजपने आज काँग्रेसविरोधात मोर्चे काढले. टिळक भवनवर निघालेला हा मोर्चा इंडिया बुल्स इमारतीपुढे पोलिसांनी अडवला. यावर भाष्य करताना काँग्रेस प्रदेशाध्यक्षांनी सांगितले, की खरेतर भाजपने हा मोर्चा त्यांच्याच सरकारमध्ये असलेल्या एका मंत्र्याच्या घरावर काढायला हवा होता. या मंत्र्याचे भाऊ ‘हू किल्ड करकरे?’ पुस्तकाचे लेखक आहेत. या पुस्तकात सर्व गोष्टींचा ऊहापोह आहे. आरएसएसचा थेट संबंध कसा आहे, हेही त्यात लिहिलेले आहे. हा मोर्चा काँग्रेस कार्यालयावर आलाच असता तर त्यांना सामोरे जाऊन हे पुस्तकही त्यांना भेट दिले असते, असे सपकाळ म्हणाले.

सर्वोच्च न्यायालयात केव्हा जाणार?
रेल्वे बॉम्बस्फोटातील निकालाविरोधात सर्वोच्च न्यायालयात जाण्याचा निर्णय राज्य सरकारने लगेच जाहीर केला; पण मालेगाव प्रश्नी अद्याप सरकारने भूमिका घेतलेली नाही. मालेगाव प्रकरणात फडणवीस सरकार सर्वोच्च न्यायालयात जाणार का हे त्यांनी स्पष्ट करावे, असेही सपकाळ यांनी सांगितले.
...
भाजपचा दुपट्टीपणा
आयपीएस अधिकारी हेमंत करकरे यांच्याबद्दल महाराष्ट्राला नितांत आदर आहे. ते देशासाठी हुतात्मा झाले. दरवर्षी २६/११ला त्यांच्या प्रतिमेला पुष्पहार घालता आणि आता त्यांच्याबद्दल बेताल वक्तव्य करता हा भाजप, देवेंद्र फडणवीस व त्यांच्या समर्थकांचा दुपट्टीपणा आहे, अशी टीका सपकाळ यांनी केली. मालेगाव प्रकरणात आरोपपत्र कसे बदलले, या खटल्यासाठी नियुक्त केलेल्या विशेष सरकारी वकील रोहिणी सालियन यांना प्रकरण सौम्य करण्यास कोणी सांगितले होते, या घटनाक्रमांची नीट सांगड घालून पाहावे, असेही सपकाळ म्हणाले.
......