शेकडो विद्यार्थ्यांना आयडियल स्टडी ॲपची भेट
बदलापूर, ता. २ (बातमीदार) : ग्रामीण आणि शहरी विद्यार्थ्यांना अभ्यासात मदतीचा हात देण्यासाठी रोटरी क्लब बदलापूर इंडस्ट्रियल एरियाच्या वतीने, दहावीतील २०७ विद्यार्थ्यांना ‘आयडियल स्टडी ॲप’ मोफत देण्यात आले. या ॲपमुळे विद्यार्थ्यांच्या गुणवत्तेत नक्कीच वाढ होईल, असा विश्वास शिक्षकांनी व्यक्त केला. या उपक्रमाअंतर्गत बदलापूर शहरातील १३० आणि मुरबाड तालुक्यातील सह्याद्री विद्यालय, बंगरपाडा, नारीवली आदी भागातील ७७ विद्यार्थ्यांचा समावेश होता. लोकमान्य टिळक पुण्यतिथी व अण्णाभाऊ साठे जयंतीनिमित्त प्रतिमा पूजनासह कार्यक्रमाची सुरुवात झाली. सह्याद्री विद्यालयात वृक्षारोपण तसेच माजी विद्यार्थ्यांकडून १५ नवीन बेंच भेट देण्यात आले. नवीन वर्गाचे उद्‍घाटनही यावेळी करण्यात आले. प्रसाद पल्लीवाल यांनी शाळेतील सर्व विद्यार्थ्यांना लेखन साहित्याचे वाटप केले. या उपक्रमाला क्लबचे माजी अध्यक्ष पराग पोतनीस, अक्षदा पाध्ये, शलाका मानगेकर, प्रियांका पल्लीवाल व इतर सदस्य उपस्थित होते. शिक्षकांनी रोटरीच्या या सामाजिक उपक्रमाचे स्वागत केले.