‘दादा’गिरी खपवून घेणार नाही!

राज्यात जातीय सलोखा महत्त्वाचा : उपमुख्यमंत्री अजित पवार

माणगाव, ता. २ (बातमीदार) : ‘उद्योगांना सकारात्मक वातावरण निर्माण करताना कोणी दादागिरी दाखवून त्रास देण्याचा प्रयत्न करीत असेल, तर खपवून घेतले जाणार नाही. मग तो कोणत्याही पक्षाशी संबंधित असो, उद्योजकांना त्रास दिल्यास आरोपींवर मकोका लावण्याचे आदेश पोलिसांना देण्यात आले आहेत,’ अशी माहिती रायगडच्या दौऱ्यावर आलेले उपमुख्यमंत्री अजित पवार यांनी शनिवार (ता. २) दिली.

पुण्यातील उद्योगविश्वात सुरू असलेल्या ‘दादागिरी’संदर्भात अजित पवार म्हणाले, ‘राज्यात येणाऱ्या उद्योगांना सुरक्षा देणे, त्यांना सोयी-सुविधा देण्याचे काम महायुती सरकारचे आहे. पोलिसांकडे तक्रार करूनही जर ही दादागिरी थांबत नसेल तर अशा गुन्हेगारांवर मकोका लावण्याच्या सूचना पुणे पोलिस आयुक्तांना देण्यात आल्या आहेत. राज्यात गुंतवणूक वाढावी, रोजगाराच्या संधी निर्माण व्हाव्यात यासाठी उद्योगांना पोषक वातावरण निर्माण करणे गरजेचे आहे. दादागिरी, धमकी किंवा अडथळा निर्माण करणाऱ्यांना वेळीच लगाम घातला नाही, तर उद्योग महाराष्ट्र सोडून अन्य राज्यामध्ये जातील आणि त्यामुळे स्थानिक तरुणांना रोजगार मिळण्याची संधीही कमी होईल.’ पुढे त्यांनी सांगितले, ‘महाराष्ट्राचे आराध्य दैवत छत्रपती शिवाजी महाराज यांनी जातीय सलोखा राखून स्वराज्य निर्माण केले. त्यांचा आदर्श घेऊन राष्ट्रवादी काँग्रेस पक्ष ‘सर्वधर्मसमभाव’चा नारा देत जातीय सलोखा राखण्याचा प्रयत्न करीत आहे. त्यामुळे देशात व राज्यात गुण्यागोविंदाने राहून जातीभेद न करता सलोखा निर्माण करण्याचे कार्य राष्ट्रवादी काँग्रेस करीत आहे.’ माणगाव शहरात झालेल्या या कार्यक्रमात या वेळी ॲड. राजीव साबळे यांनी आपल्या हजारो कार्यकर्त्यांसह राष्ट्रवादी काँग्रेस पक्षात प्रवेश केला तसेच या वेळी गीता दत्तात्रय तटकरे नर्सिंग विद्यालयाचे उद्‍घाटन अजित पवार यांच्या हस्ते करण्यात आले.

अजित पवार मुख्यमंत्री व्हावेत, अशी जनतेची इच्छा!
रायगड जिल्ह्यात शिक्षणाचे हब सुरू व्हावे, यासाठी प्रयत्न केले जात आहेत. येथील विद्यार्थ्यांना दर्जेदार शिक्षणासाठी वेगवेगळी शिक्षणाची दालने उभी केले जात आहेत. शिक्षण व आरोग्य सुविधांसाठी शासनाकडून निधी उपलब्ध करून दिला जाईल. अजित पवार यांनी अर्थसंकल्प मांडण्याचा विक्रम केला आहे. तो कोणीही मोडू शकणार नाही. ते मुख्यमंत्री व्हावेत अशी जनतेची इच्छा आहे, अशी प्रतिक्रिया या वेळी खासदार सुनील तटकरे यांनी दिली.