तपास यंत्रणेवर दबाव टाकणाऱ्यांची नार्को टेस्ट करा
मालेगाव बॉम्बस्फोटाप्रकरणी उपमुख्यमंत्री एकनाथ शिंदे यांची मागणी

ठाणे, ता. २ : मालेगाव बॉम्बस्फोट प्रकरणात तपास यंत्रणेवर दबाव टाकणाऱ्यांची नार्को टेस्ट केली पाहिजे, म्हणजे तत्कालीन काँग्रेस सरकारचा खरा चेहरा समोर येईल, अशी मागणी उपमुख्यमंत्री एकनाथ शिंदे यांनी केली आहे. भगवा आतंकवाद आणि दहशतवाद असे आरोप करून काँग्रेसने हिंदुत्वाचा अपमान केला असल्याचेही ते म्हणाले. उपमुख्यमंत्री एकनाथ शिंदे यांनी शनिवारी (ता. २) पत्रकारांशी संवाद साधला. या वेळी मालेगाव बॉम्बस्फोट निकालावर बोलताना ते म्हणाले, ‘या सर्व प्रकरणात सरसंघचालक मोहन भागवत यांचे नाव घेण्यासाठी छळ करण्यात आला, असा जबाब यापूर्वी एका निवृत्त पोलिस अधिकाऱ्याने दिला होता, हे दुर्दैवी आहे. साध्वी प्रज्ञा सिंग यांनी पंतप्रधान नरेंद्र मोदी यांचे नाव घ्यावे, यासाठी त्यांचा अतोनात छळ करण्यात आला. खरेतर तत्कालीन काँग्रेस सरकार हे हिंदुत्वाच्या विरोधात होते. मतांच्या राजकारणासाठी ते कोणत्याही थराला जाऊ शकतात, त्याचे हे उदाहरण आहे.’ पुढे त्यांनी सांगितले, ‘दहशतवादाला कोणताही रंग नसतो, असे तत्कालीन राज्यकर्ते म्हणाले होते. त्यांना भगवा आतंकवाद सिद्ध करायचा होता. त्यासाठी तत्कालीन काँग्रेस सरकारने कारस्थान रचले,’ असा आरोप करीत उपमुख्यमंत्री एकनाथ शिंदे यांनी काँग्रेसने हिंदू धर्मीयांची माफी मागावी, अशी मागणी केली. दरम्यान, या प्रकरणी आम्ही हिंदुत्व सोडले नाही, असे म्हणणाऱ्यांनी एक शब्दही काढला नाही, असे म्हणून त्यांनी उद्धव ठाकरे यांच्यावरही टीका केली.