मराठा समाजावर आरक्षणाची कृपादृष्टी कशासाठी?
आरक्षणाला विरोध करणाऱ्यांचा उच्च न्यायालयात युक्तिवाद
सकाळ वृत्तसेवा
मुंबई, ता. २ ः विविध समाज, जातींकडून सामाजिक अथवा शैक्षणिक आरक्षण मिळवण्यासाठी विशेष मागासवर्ग आयोगाकडे (एसबीसी) अर्ज करण्यात येतात; परंतु त्या अर्जांकडे कानाडोळा करून केवळ मराठा समाजाच्या आरक्षणाच्या मुद्द्याकडे वारंवार लक्ष दिले जात आहे. मराठा समाजावरच आरक्षणाची कृपादृष्टी कशासाठी, असा सवाल शनिवारी (ता. २) मराठा आरक्षणाला विरोध करणाऱ्या याचिकाकर्त्यांनी न्या. रवींद्र घुगे, न्या. निजामुद्दीन जमादार आणि न्या. संदीप मारणे यांच्या पूर्णपीठापुढे केला.
विशेष मागासवर्ग आयोगाकडे आरक्षणासाठी अर्ज, निवदने येतात; परंतु आयोग त्याकडे लक्ष देत नाही. मराठा आरक्षणासंदर्भात निवेदन येताच त्याकडे लागलीच लक्ष दिले जाते, हे कशासाठी, अशी विचारणा मराठा आरक्षणाला विरोध करणाऱ्या ॲड. संजित शुक्ला यांच्या वतीने ॲड. प्रदीप संचेती यांनी केली. मराठा समाज हाच आर्थिकदृष्ट्या मागास आहे, अन्य कोणताही समाज नाही का, असा प्रश्नही त्यांनी उपस्थित केला. त्यावर न्यायालयाने डबेवाले, कामगार, हमाल आणि दुर्गम भागात राहणाऱ्या गरीब समाजाचे काय, अनेकांची आर्थिक स्थिती बेताची असल्यामुळे त्यांना शिक्षण सोडून देण्याची वेळ आली आहे, त्यांचे काय, अशी विचारणा केली. त्या वेळी अशी समस्या अन्य जाती, समाजामध्येही आहे. केवळ मराठा समाजच अशा समस्यांना सामोरे जातो आहे असे नाही, असे ॲड. संचेती यांनी न्यायालयाच्या निदर्शनास आणून दिले. मराठा समाजाला इतक्या तप्तरतेने आरक्षण देण्याची गरज नव्हती किंवा कोणतीही अनन्यसाधारण, अभूतपूर्व परिस्थिती निर्माण झाली नसतानाही आरक्षण देण्यात आल्याचेही संचेती यांनी न्यायालयाला सांगण्याचा प्रयत्न केला. त्याचील दखल घेऊन न्यायालयाने याचिकेवर २० ऑगस्ट रोजी सुनावणी ठेवली.
----