जमिल शेख हत्याप्रकरणी ‘एसआयटी’ची मागणी
जितेंद्र आव्हाड उपमुख्यमंत्री एकनाथ शिंदे यांच्या भेटीला

सकाळ वृत्तसेवा
ठाणे, ता. २ : सध्या पक्षांतराचे वारे वाहत असताना शनिवारी (ता. २) दुपारी राष्ट्रवादी शरद पवार गटाचे आमदार डॉ. जितेंद्र आव्हाड यांनी उपमुख्यमंत्री एकनाथ शिंदे यांच्या ठाणे येथील निवासस्थानी भेट घेतली. बीडमधील महादेव मुंडे प्रकरणात मुख्यमंत्री देवेंद्र फडणवीस यांनी एसआयटी स्थापन करण्याचे आदेश दिले. त्याच धर्तीवर राबोडीत पाच वर्षांपूर्वी मनसे पदाधिकारी जमिल शेख यांच्या हत्येप्रकरणी एसआयटी स्थापन करून त्याच्या पत्नीला व कुटुंबीयांना न्याय देण्यात यावा, अशी मागणी करण्यासाठी ही भेट असल्याचे आव्हाड यांनी सांगितले. दरम्यान, या भेटीत नेमके काय घडले, यावर उलटसुलट चर्चा रंगत आहेत.

उपमुख्यमंत्री एकनाथ शिंदे आणि आमदार डॉ. जितेंद्र आव्हाड यांच्या मैत्रीत अंतर आले आहे. नोव्हेंबर २०२४मध्ये या दोघांमध्ये थेट संवाद झाला होता. पण दीर्घकाळानंतर शनिवारी आव्हाड यांच्या गाड्यांचा ताफा उपमुख्यमंत्री एकनाथ शिंदे यांच्या ठाण्यातील निवासस्थानी वळला आणि अनेकांच्या भुवया उंचावल्या. बराच वेळ या दोघांमध्ये चर्चा सुरू होती. त्यामुळे अंदाजांचे अनेक कयास लावले जात होते. पण ही भेट जमिल शेखच्या कुटुंबीयांना न्याय मिळवून देण्यासाठी असल्याचे स्पष्टीकरण भेटीनंतर आमदार आव्हाड यांनी दिले. मनसेचा पदाधिकारी असलेला जमिल शेख याची हत्या पाच वर्षांपूर्वी राबोडी येथे झाली होती. ही हत्या राष्ट्रवादी अजित पवार गटाचे ठाणे जिल्हाध्यक्ष नजीब मुल्ला यांनी केल्याचा संशय व्यक्त केला जात आहे. एकेकाळी नजीब मुल्ला हे आव्हाड यांचे शिष्य मानले जात होते.