ॲड. प्रवीण ठाकूर यांचा राष्ट्रवादी काँग्रेसमध्ये प्रवेश
उपमुख्यमंत्री अजित पवार यांची प्रमुख उपस्‍थिती
अलिबाग, ता. ३ (वार्ताहर) ः अलिबाग मतदारसंघाचे माजी आमदार मधूशेठ ठाकूर यांचे चिरंजीव व काँग्रेस नेते ॲड. प्रवीण ठाकूर यांनी शनिवारी (ता. २) शेकडो कार्यकर्त्यांसह राष्ट्रवादी काँग्रेस पक्षात अधिकृत प्रवेश केला. उपमुख्यमंत्री व राष्ट्रवादी काँग्रेसचे राष्ट्रीय अध्यक्ष अजित पवार यांच्या प्रमुख उपस्थितीत अलिबाग येथे पार पडलेल्या पक्षप्रवेश सोहळ्यात हा राजकीय प्रवेश मोठ्या उत्साहात झाला. या प्रवेशामुळे अलिबाग व रायगड जिल्ह्यात राष्ट्रवादी काँग्रेसची ताकद वाढणार असल्याचे राजकीय वर्तुळात बोलले जात आहे.
या वेळी माणगाव येथील शिवसेना नेते ॲड. राजीव साबळे, तसेच बेलोशी व माणकुळे ग्रामपंचायतींचे सदस्यही राष्ट्रवादी काँग्रेसमध्ये सहभागी झाले. मंचावर खासदार सुनील तटकरे, आदिती तटकरे, अनिकेत तटकरे, अशोक भोपतराव, ऋषिकांत भगत, उमा मुंढे यांच्यासह अनेक नेते, पदाधिकारी आणि कार्यकर्ते उपस्थित होते. कार्यक्रमात बोलताना अजित पवार म्हणाले, राष्ट्रवादी काँग्रेस हा सर्वधर्मसमभाव मानणारा पक्ष असून, आम्ही प्रत्येक नवनिर्वाचित नेत्याचा सन्मान करतो. ॲड. प्रवीण ठाकूर हे त्यांच्या वडिलांच्या राजकीय वारशाचे योग्यरित्या पुढे नेत असून, त्यांच्यासारख्या तरुण नेतृत्वाची पक्षाला नितांत गरज आहे. प्रवेशानंतर बोलताना ॲड. प्रवीण ठाकूर यांनी सांगितले की, अलिबागमधील रस्ते, पाणी, आरोग्य व शिक्षण या मूलभूत समस्या सोडवण्यासाठी आम्ही महायुतीच्या माध्यमातून प्रयत्न करणार आहोत. खासदार सुनील तटकरे यांच्या दूरदृष्टीमुळे जिल्ह्यातील विकासकामांना गती मिळत आहे. याच दृष्टिकोनातून आम्ही राष्ट्रवादी काँग्रेसमध्ये प्रवेश केला आहे. या प्रवेशामुळे अलिबागमधील राजकीय समीकरणांवर परिणाम होणार असून, राष्ट्रवादी काँग्रेसला स्थानिक स्तरावर नवसंजीवनी मिळणार असल्याचे स्पष्ट होत आहे.