निर्विघ्‍नपणे गणेशोत्‍सव साजरा करा!
सार्वजनिक मंडळांना पोलिसांच्या सूचना
घाटकोपर, ता. ३ (बातमीदार) ः आगामी गणेशोत्सवाच्या पार्श्वभूमीवर घाटकोपर पोलिस आणि हद्दीतील सर्व गणेशोत्सव मंडळाच्या पदाधिकाऱ्यांची एक बैठक आयोजित करण्यात आली होती. पोलिसांनी पदाधिकाऱ्यांना सुरक्षेच्या दृष्टीने काही कडक सूचना दिल्या.
घाटकोपर पोलिस ठाण्याचे वरिष्ठ पोलिस निरीक्षक बळवंत देशमुख यांच्या मार्गदर्शनाखाली बैठक घेण्यात आली. आता बीट चौकीनुसार बैठका घेऊन पोलिसांनी मंडळाच्या पदाधिकाऱ्यांना गणेशोत्सव निर्विघ्नपणे पार पाडण्यासाठी काही महत्त्वाच्या सूचना केल्या. या वेळी बीट अधिकारी नानासाहेब डाके, शरद शेटे यांच्यासह इतर अधिकारी उपस्थित होते. गणेशोत्सव साजरा करण्यासाठी उभारण्यात येणारा मंडप तसेच इतर बाबी यांची संबंधित विभागाकडून परवानगी प्राप्त करणे, सर्व मंडळांनी ध्वनिक्षेपक वापराची परवानगी प्राप्त करावी, गणपती आगमन आणि विसर्जनाची परवानगी घेण्यात यावी, मंडपामुळे रहदारीस अडथळा निर्माण होणार नाही याची दक्षता घ्यावी, सीसीटीव्ही कॅमेरे बसविण्यात यावेत, वाहन पार्किंग, डीजे वापरण्यास बंदी असल्याने कोणीही आगमन किंवा विर्सजन मिरवणुकीदरम्यान वापर करू नये, आगमन व विसर्जन मिरवणूक एकाच ठिकाणी रेंगाळत ठेवणार नाही याची दक्षता घ्यावी, मिरवणुकीदरम्यान इतर धर्मीयांची भावना दुखावणार नाही याची दक्षता घ्यावी, वर्गणी गोळा करताना कोणीही जबरदस्ती करू नये, तक्रार प्राप्त झाल्यास कायदेशीर कारवाई करण्यात येईल, असा इशारा पोलिसांनी दिला.
ही बैठक घाटकोपर पोलिस ठाण्याचे वरिष्ठ पोलिस निरीक्षक बळवंत देशमुख, पोलिस निरीक्षक नालंदा लांडगे, उपनिरीक्षक शरद शेटे, अंमलदार ठाकूर यांच्या उपस्थितीत शिवाजी हॉल, कामा गल्ली, घाटकोपर पश्चिम येथे पार पडली.