उल्हासनगर, ता. ३ (वार्ताहर) : मध्यवर्ती पोलिस ठाणे हद्दीत अवैध सुरू असलेल्या हुक्का पार्लरवर गुन्हे शोध पथकाने धाड टाकून तंबाखूजन्य पदार्थांसह विविध साहित्य हस्तगत करत मुख्य आरोपीसह सहा जणांवर गुन्हा दाखल केला आहे. ही कारवाई पोलिस उपायुक्त सचिन गोरे यांच्या मार्गदर्शनाखाली वरिष्ठ निरीक्षक शंकर अवताडे नेतृत्वाखाली शुक्रवारी (ता. १) मध्यरात्री १ वाजण्याच्या सुमारास उल्हासनगर कॅम्प ३ मधील इंदिरा गांधी भाजी मार्केटजवळ करण्यात आली.
एक व्यक्ती आपल्या राहत्या घरीच बेकायदा हुक्का पार्लर चालवत असल्याचे समजताच गुन्हे शोध पथकाचे अधिकारी व अंमलदारांना सतर्क करण्यात आले. त्यानुसार पोलिस पथकाने तातडीने कारवाईसाठी घटनास्थळी धाव घेतली. छापा टाकताना शंकर बनसोडे राज जितू बेहेनवाल (वय २२) यांच्या मदतीने ग्राहकांना हुक्काचे भांडे भरून देताना आढळला. घटनास्थळी चार ग्राहक हुक्का सेवन करताना आढळले. पोलिसांनी त्वरित कारवाई करत सर्वांना ताब्यात घेतले. या छाप्यात तंबाखूजन्य पदार्थ व हुक्का पार्लरमध्ये वापरले जाणारे साहित्य असे एकूण ७,५७० रुपये किमतीचा मुद्देमाल हस्तगत केला. घटनास्थळी पंचनामा करून सर्व पुरावे जमा करण्यात आले आहे. याप्रकरणी मध्यवर्ती पोलिस ठाण्यात गुन्हा दाखल केला आहे.