उल्हासनगर, ता. ३ (बातमीदार) : परमिट आणि परवानगी नसणाऱ्या खासगी व्हॅनचा विद्यार्थ्यांसाठी वापर करण्यात येत असल्याचा धक्कादायक आरोप युवासेना शहरप्रमुख सुशील पवार यांनी कल्याण आरटीओ व उल्हासनगर वाहतूक शाखेचे सहाय्यक पोलिस आयुक्त विजय पोवार यांना दिलेल्या निवेदनात केला आहे. अशा व्हॅनच्या मालकांवर व वाहनचालकांवर कायदेशीर कारवाई करावी, अशी मागणीही त्यां‍नी केली आहे.
शहरात शाळेतील विद्यार्थ्यांना शाळेतून ने-आण करण्यासाठी खासगी व्हॅनचा वापर केला जात आहे. त्या व्हॅनला परमिट व परवानगी नाही. तसेच व्हॅनच्या वाहनचालकाकडे परवाना नाही. वाहनचालकावर कुठल्या प्रकारचा गुन्हा दाखल आहे की नाही, याची पोलिस तपासणी करत नाहीत. विशेष म्हणजे काही शाळांनी विद्यार्थ्यांना घरून अर्ज भरण्यास सांगितले. त्यात व्हॅनबाबत शाळेबाहेर काही घडल्यास त्याची जबाबदारी शाळेची नाही, असे नमूद केले आहे. हा प्रकार गंभीर असून व्हॅनमालकांवर व चालकावर कायदेशीर दंडात्मक कारवाई करण्यात यावी, असे पवार यांनी निवेदनात म्हटले आहे. यावर लवकरात लवकर कारवाई करण्याची मोहीम हाती घेतली जाणार, असे आश्वासन सहाय्यक पोलिस आयुक्त विजय पोवार यांनी दिले. याप्रसंगी सचिव शिवम साळवे, उपशहराध्यक्ष प्रवीण करीरा, किंगली आवळा, रवी वर्मा आदी पस्थित होते.