कल्याण, विठ्ठलवाडी आगारांचे मूल्यांकन
महामंडळाकडून बसस्थानकांची पाहणी
संतोष दिवाडकर
कल्याण, ता. ३ (बातमीदार) : कल्याण व विठ्ठलवाडी एसटी आगार तसेच या आगाराअंतर्गत येणाऱ्या डोंबिवली व बदलापूर एसटीस्थानकांचे नुकतेच एसटी महामंडळाने सर्वेक्षण केले. तसेच तेथील परिस्थिती पाहून त्यांचे मूल्यांकन केले. विठ्ठलवाडी एसटी आगारातील दुरवस्थेसंदर्भात या अगोदरही सकाळने वृत्त दिले होते. त्यानंतर आता अधिकाऱ्यांनी हिंदुहृदयसम्राट बाळासाहेब ठाकरे स्वच्छ, सुंदर बसस्थानक अभियानअंतर्गत या दोन्ही आगारांच्या परिस्थितीची पाहणी केली आहे.

महाराष्ट्र राज्यमार्ग परिवहन महामंडळाच्या संकल्पनेनुसार या योजनेचे मुख्य उद्दिष्ट राज्यातील सर्व एसटी आगार तसेच बसस्थानक परिसर स्वच्छ, सुंदर व दर्जेदार ठेवणे व प्रवाशांना उत्तम सेवा देणे हे आहे. सर्व बसस्थानकांचे शहरी ‘अ’, निमशहरी ‘ब’ आणि ग्रामीण ‘क’ अशा तीन गटांमध्ये वर्गीकरण केले आहे. वर्गवारीनुसार बसस्थानकांवर झाडू, ब्रश, ॲसिड, फिनेल, शांपू, कचरा टोपल्या, इ.साहित्य पुरवण्यासाठी वर्गानुसार निधी दिला जातो. प्रत्येक बसस्थानकाचे नियमितपणे मूल्यांकन होत असून, उत्तम कार्य करणाऱ्या आगारांना मोठ्या प्रमाणात रोख बक्षिसे दिली जाणार आहेत. स्थानकांवरील स्वच्छता, शौचालये, प्रवाशांसाठीच्या आसन व्यवस्था, कर्मचाऱ्यांना दिल्या जाणाऱ्या सुविधा या सर्व बाबी विचारात घेतल्या जातात.

कल्याण एसटी आगाराची नव्याने उभारणी केली जाणार असून, विठ्ठलवाडी एसटी आगारही नूतनीकरणाच्या मार्गावर आहे. त्यामुळे तूर्तास या दोन्ही आगारांना चांगले मूल्यांकन मिळणे जिकिरीचे आहे. असे असले तरी आगारात आवश्यक सोयीसुविधा मिळणे गरजेचे असल्याचे प्रवाशांकडून नमूद केले आहे. त्याचबरोबर एसटी बसेस नियमितपणे सोडण्यात याव्यात, अशाही सूचना प्रवाशांनी केलेल्या आहेत.

बदलापूर एसटीस्थानकात गैरसोय
विठ्ठलवाडी एसटी आगाराअंतर्गत येणाऱ्या बदलापूर स्थानकाचीदेखील या वेळी पाहणी करण्यात आली. यात शौचालयांची दुरवस्था झाली असल्याचे अधिकाऱ्यांच्या निदर्शनास आले. त्याचबरोबर बसस्थानकाच्या आवारात अतिक्रमणासह खासगी वाहनांची अनधिकृतपणे पार्किंग होत असल्याने एसटी बस उभे करण्यास अडथळा ठरत आहे. बदलापूर स्थानकातून एसटी बसेस वेळेत सुटत नसून विशेषतः पनवेल बसच्या पासधारकांचे नुकसान होत असल्याची तक्रारही प्रवाशांनी पाहणीसाठी आलेल्या अधिकाऱ्यांकडे केली आहे. त्याचबरोबर एसटीचे आरक्षण करण्यासाठी आम्हाला विठ्ठलवाडीला जावे लागते. त्यामुळे गैरसोय टाळण्यासाठी बदलापूर स्थानकातच आरक्षण केंद्र सुरू करावे, अशी अनेक महिन्यांपासून मागणी असून, गणेशोत्सव जवळ आला तरीही ते सुरू झाले नसल्याची खंत प्रवासी संघटनांनी व्यक्त केली आहे. यावर ठाणे विभागाकडून विठ्ठलवाडी आगार व्यवस्थापकांना सूचनाही करण्यात आल्या असून, आरक्षण केंद्रासाठी लागणारे सर्व साहित्य पुरवले असल्याची माहिती आहे. त्याचबरोबर दोन्ही आगारांत चौकशीसाठी फोन नसल्याचेही प्रवाशांनी अधोरेखित केले आहे.

व्यवस्थापकांचे स्पष्टीकरण :
विठ्ठलवाडी आगारासह बदलापूर स्थानकाचे नूतनीकरण येत्या काळात होणार असून, त्यानंतर सर्व समस्या सुटतील. बदलापूर स्थानकातील अतिक्रमण तसेच अनधिकृत पार्किंगसंदर्भात स्थानिक प्रशासनाला निवेदन दिले असल्याची माहिती विठ्ठलवाडी आगार व्यवस्थापक नवज्योत गावडे यांनी दिली आहे. त्याचबरोबर पनवेल एसटीला होणारा विलंब हा रस्त्यांवरील वाहतूक कोंडीमुळे होत असल्याचे गावडे यांनी सांगितले आहे. बदलापूर स्थानकात आरक्षण केंद्र सुरू करण्याची प्रवाशांची मागणी असून, येत्या काही दिवसांतच ते सुरू केले जाईल, असे या वेळी आगार व्यवस्थापक गावडे यांनी सकाळशी बोलताना सांगितले.