अलिबागमध्ये महसूल सप्ताहांतर्गत वृक्षारोपण
अलिबाग (वार्ताहर) ः रायगड जिल्ह्यात १ ते ७ जुलैदरम्यान महसूल सप्ताह साजरा करण्यात येत आहे. या सप्ताहांतर्गत रविवारी (ता. ३) अलिबाग तालुक्यामध्ये पाणंद रस्त्याच्या दुतर्फा वृक्षलागवड मोहीम उत्साहात राबविण्यात आली.
पालकमंत्री शेत पाणंद रस्ते योजनेंतर्गत पाणंद आणि शिव पाणंद रस्त्यांची मोजणी करून रस्त्यांच्या दुतर्फा वृक्षारोपण करण्याचा उपक्रम महसूल सप्ताहांतर्गत राबविण्यात आला. ही झाडे तोडल्यास वनविभागाच्या कायद्यांतर्गत कारवाई करण्यात येणार आहे. याबाबतची माहितीही ग्रामस्थांना या वेळी देण्यात आली. या कार्यक्रमासाठी तहसीलदार विक्रम पाटील, पेझारी सरपंच प्राजक्ता धीरज म्हात्रे, चरी सरपंच नीलम पाटील, गावकी अध्यक्ष, महसूल अधिकारी व कर्मचारी उपस्थित होते.