पुनर्विकासासाठी बेमुदत उपोषण
कल्याण, ता. ३ (वार्ताहर) : चौदा वर्षे उलटूनही कल्याण पश्चिमेतील कोकण वसाहतीतील नागरिकांची पुनर्विकास प्रकल्प पूर्ण न झाल्याने फरपट सुरू आहे. हा प्रकल्प रखडण्यास कारणीभूत असलेल्या विकसकावर गुन्हे दाखल करावे, रहिवाशांना हक्काची घरे मिळावीत, यासाठी कल्याण पश्चिमचे भाजपचे माजी आमदार नरेंद्र पवार यांनी या बाधित नागरिकांसह कल्याणच्या पोलिस उपायुक्त कार्यालयाबाहेर बेमुदत उपोषण सुरू केले आहे.

कल्याण पश्चिमेतील बिर्ला काॅलेज परिसरात कोकण वसाहत माध्यमातून आर्थिकदृष्ट्या मागास उत्पन्न गट, मध्यमवर्गीय, उत्पन्न गट, उच्चतम उत्पन्न गट या गटवारीनुसार लोकांनी ३५ वर्षांपूर्वी म्हाडाअंतर्गत घरे घेतली. सुमारे १४ वर्षांपूर्वी पुनर्विकासाच्या नावाखाली दोन वेगवेगळ्या विकसकांनी कोकण वसाहतीतील पुनर्वसन बाधित सदनिकाधारकांना वाढीव क्षेत्रासह बहुमजली इमारतीत सदनिका, तसेच सदनिका पूर्ण होण्याच्या कालावधीपर्यंत घरभाडे देणार असे सांगितले होते; मात्र सुमारे १४ वर्षे होऊनदेखील घरभाडे अन् घरदेखील नाही. त्यामुळे आपली फरपट होत असून काहींवर घरभाडे भरण्याचा आर्थिक बोजा पडत आहे. याबाबत भाजपचे माजी आमदार नरेंद्र पवार यांनी सुमारे १,६०० पुनर्विकास प्रकल्पबाधित सदनिकाधारकांच्या पाठीशी उभे राहत पोलिस उपायुक्त कार्यालयालगत रविवारी (ता. ३) बेमुदत उपोषण सुरू केले आहे. या उपोषणास प्रचंड प्रतिसाद लाभला असून समाजातील सर्वच वर्गातून त्यांना पाठिंबा मिळत आहे. शनिवारी शिंदे गट शिवसेनेचे आमदार विश्वनाथ भोईर आणि भाजप माजी आमदार नरेंद्र पवार, यांच्यामध्ये आरोप-प्रत्यारोपाचा कलगीतुरा रंगला.