शिवसेना शिंदे गटाचे ‘वन टू का फोर’
मुंबईतील माजी नगरसेवकांची संख्या १२४च्या घरात; पक्षप्रवेशाचा धडाका सुरूच
सकाळ वृत्तसेवा
ठाणे, ता. ३ : आगामी महापालिका निवडणुकांच्या पार्श्वभूमीवर शिवसेना शिंदे गटामध्ये माजी नगरसेवकांच्या पक्षप्रवेशाचा धडाका सुरूच आहे. सायन कोळीवाड्यातील शिवसेना ठाकरे गटाचे माजी नगरसेवक रामदास कांबळे यांनी रविवारी (ता. ३) ठाण्यात उपमुख्यमंत्री एकनाथ शिंदे यांच्या उपस्थितीत शिंदे गटात प्रवेश केला. या प्रवेशामुळे शिवसेना शिंदे गटाकडे मुंबईत आता १२४ माजी नगरसेवकांची कुमक तयार झाली आहे. त्यामुळे ‘वन टू का फोर’ करीत मुंबईत महायुतीची सत्ता येणारच, असा विश्वास एकनाथ शिंदे यांनी या वेळी व्यक्त केला.
आपल्या प्रभागातील विकासकामांना गती देण्यासाठी रविवारी सायन कोळीवाडा प्रभाग क्रमांक १७३चे माजी नगरसेवक रामदास कांबळे यांनी शिंदे गटात पक्षप्रवेश केला. आनंदाश्रमात हा पक्षप्रवेश पार पडला. या वेळी रामदास कांबळे यांच्या पत्नी पूजा कांबळे आणि प्रभागातील ठाकरे गटाचे पदाधिकारी, युवासेनाच्या कार्यकर्त्यांनीही शिंदे गटात प्रवेश केला. पक्षप्रवेशावेळी कांबळे यांनी आपल्या प्रभागातील समस्या मांडत त्या सोडवण्याची विनंती केली. एकनाथ शिंदे म्हणाले, की ‘आपण अडीच वर्षे मुख्यमंत्री असताना मुंबईत विकासकामे झाली, विकासासाठी शिवसेनेसोबत येण्याचा निर्णय कांबळे यांनी घेतला आहे. त्यांनी सुचवलेली बरीच कामे आपल्या अखत्यारित येतात, त्यामुळे विकासासाठी झटपट निर्णय घेतला जाईल, ही त्यांना खात्री आहे, या विश्वासावरच मुंबई महापालिका क्षेत्रातील १२४ माजी नगरसेवक आज शिवसेनेसोबत आहेत.’ दरम्यान, पालिका निवडणूक महायुती म्हणून लढणार असल्याचे शिंदे यांनी या वेळी सांगितले.

काही लोकांची दुकाने बंद झाली!
‘मुंबई महापालिकेत ज्यांची सत्ता २० वर्षे होती, ते मुंबईला सोन्याची अंडी देणारी कोंबडी समजत होते; पण आपण मुख्यमंत्री असताना मुंबई खड्डेमुक्तीचा संकल्प केला, त्यातील एक टप्पा पूर्ण होईल, भविष्यात मुंबईत खड्डा शोधावा लागेल. त्यामुळे त्यांची दुकाने बंद झाली आहेत,’ असा खोचक टोला उपमुख्यमंत्री एकनाथ शिंदे यांनी उद्धव ठाकरे यांचे नाव न घेता लगावला.