माजी आयुक्त अनिलकुमार पवार यांना ईडीचा समन्स
विरार, ता. ३ (बातमीदार) : वसई-विरार शहर महापालिकेचे माजी आयुक्त अनिलकुमार पवार यांना ‘ईडी’ने समन्स बजावला असून त्यांना सोमवारी (ता. ४) ईडी कार्यालयात उपस्थित राहण्यास सांगण्यात आले आहे. यामध्ये अनिलकुमार पवार यांच्या पत्नी भारती पवार यांना ही स्वतंत्र समन्स बजावले आहे.

माजी आयुक्त अनिलकुमार पवार वसईतील शासकीय निवासस्थानासह मुंबई, नाशिक, पुणे, सटाणा अशा विविध १२ ठिकाणी मंगळवारी (ता. २९) ईडीने एकाच वेळी छापेमारी केली होती. या कारवाईत नाशिक येथील पुतण्याकडे एक कोटी ३३ लाख रुपयांची रोकड व काही मालमत्तांची कागदपत्रे ईडीने जप्त केली. पालिका हद्दीतील ४१ इमारतींचे अनधिकृत बांधकामाप्रकरणी त्यांच्यावरही कारवाई करण्यात आली. या प्रकरणाचा अधिक तपास करण्यासाठी ईडीने अनिलकुमार पवार व त्यांच्या पत्नी अशा दोघांना समन्स बजावले आहे. या एकूणच धाडसत्रप्रकरणी पवार यांच्यासह एकूण सहा जणांना समन्स बजावण्यात आल्याची माहिती खास सूत्रांनी दिली आहे.