वृद्धाची तलावात आत्महत्या
कर्जत, ता. ३ (बातमीदार) : नेरळ येथील राजबाग या उच्चभ्रू सोसायटीमध्ये राहणाऱ्या एका ८५ वर्षीय वृद्धाने जीवनाला कंटाळून आत्महत्या केल्याची दुर्दैवी घटना उघडकीस आली आहे. जनार्दन नारायण गायकवाड (वय ८५) असे या वृद्धाचे नाव असून त्यांनी जिजामाता भोसले तलावात उडी घेऊन रविवारी (ता. ३) सकाळी आपले जीवन संपवले.
जिजामाता भोसले तलावात मृतदेह पाण्यात तरंगत असल्याची माहिती नागरिकांनी पोलिसांनी दिली. पोलिसांनी घटनास्थळी धाव घेत मृतदेह पाण्याबाहेर काढला. या मृतदेहाच्या कपड्यामध्ये एक चिठ्ठी सापडली असून त्यामध्ये ‘आयुष्याला कंटाळलो आहे, स्वतःहून जीवन संपवत आहे’ असे नमूद करण्यात आले आहे. तसेच त्यांनी राजबाग या सोसायटीमध्ये राहत असल्याचे चिठ्ठीमध्ये लिहून ठेवले. दरम्यान वयोमान, एकटेपणा आणि भावनिक तणावामुळे त्यांनी हे पाऊल उचलले असण्याचा अंदाज पोलिसांनी व्यक्त केला आहे. त्यांचा मृतदेह शवविच्छेदनासाठी रुग्णालयात पाठवण्यात आला असून, पुढील तपास नेरळ पोलिस करीत आहेत.