चोरामुळे गमावला पाय
कल्याण, ता. ३ (वार्ताहर) : शहाड आणि आंबिवली रेल्वेस्थानकादरम्यान ठाण्याहून नाशिककडे तपोवन एक्स्प्रेसने जाणाऱ्या प्रवाशाला मोबाईल चोरामुळे पाय गमावावा लागल्याची घटना समोर आली आहे. ही घटना रविवारी (ता. ३) सकाळी घडली.

गौरव रामदास निकम (वय २५) असे तरुण शेतकऱ्याचे नाव आहे. तो शहाड आणि आंबिवलीदरम्यान एक्स्प्रेसच्या दारात फोनवर बोलत होता. या वेळी ही एक्स्प्रेस धीम्या गतीने चालली होती. याचाच फायदा घेत या अल्पवयीन चोराने गौरवच्या हाताला फाटका मारत मोबाईल खेचला. याचदरम्यान गौरवदेखील गाडीतून पडल्याने त्यांचा एक पाय एक्स्प्रेच्या चाकाखाली आला. या वेळी या चोरट्याने जखमी गौरवला मारहाण करीत त्यांच्या खिशातील रोकड लंपास केली. त्यानंतर लोहमार्ग पोलिसांनी जखमी तरुणाला उपचारार्थ रुग्णालयात नेत काही तासांतच त्या घटनेतील अल्पवयीन चोरट्याला ताब्यात घेतले. याप्रकरणी पोलिसांनी गुन्हा दाखल करून अल्पवयीन आरोपीला अटक केल्याची माहिती कल्याण लोहमार्ग पोलिस ठाण्याचे वरिष्ठ पोलिस निरीक्षक पंढरी कांदे यांनी दिली.