आयव्हीएफ गर्भधारणेबाबत जनजागृती
मुंबई, ता. ३ : आयव्हीएफ गर्भधारणेबद्दल जनसामान्यांच्या मनातील गैरसमज दूर करण्यासाठी अपोलो फर्टिलिटीने ‘गेस द आयव्हीएफ बेबी’ ही जनजागृतीपर मोहीम सुरू केली आहे. या मोहिमेत लोकांना अनेक नवजात बालके दाखवून त्यातील कुठले बाळ आयव्हीएफ तंत्रज्ञानाने जन्मले आहे, असा प्रश्न विचारला जातो. या प्रश्नाचे उत्तर शोधताना आयव्हीएफ उपचार पद्धतीबाबतचा लोकांमधील गैरसमज दूर होईल, असा विश्वास मोहिमेच्या आयोजन करताना व्यक्त केला.
अपोलोतर्फे यापूर्वीही अशा जनजागृतीपर मोहीम राबवण्यात आल्या आहेत. आयव्हीएफ आणि वंध्यत्वाविषयी समाजात अनेक गैरसमज असून, याबाबत विचारण्याचीही लोकांना लाज वाटते. या मोहिमेमुळे हे गैरसमज आणि न्यूनगंड दूर होतील. वंध्यत्वाबाबत वेळेवर वैद्यकीय सल्ला घेणे महत्त्वाचे असून, या उपचारांसाठी लोकांना प्रोत्साहित करण्यावरही या मोहिमेत भर दिला जाईल. या मोहिमेत अपत्य प्राप्तीसाठी इच्छुक जोडप्यांना वैज्ञानिक आणि वैद्यकीय उपचारांची माहिती दिली जाईल. आयव्हीएफ उपचार पद्धती वेदनादायक आहे, ती नैसर्गिक नाही, गर्भधारणा होण्याची संभावना नाही, अशा गैरसमजुती यातून दूर केल्या जातील. ही मोहीम १२ शहरांमध्ये प्रत्यक्ष तसेच डिजिटल माध्यमांमार्फतही राबवली जाईल, असे अपोलो हेल्थ आणि लाइफ स्टाइलचे निशांत मिश्रा म्हणाले.