सोसायटीच्या निवडणुकीवर आक्षेप
सदस्य, रहिवाशांचा प्रक्रियेला विरोध
सकाळ वृत्तसेवा
डोंबिवली, ता. ४ : कल्याण ग्रामीणमधील कासा रिओ आणि कासा गोल्ड को-ऑप. हाउसिंग सोसायटीची निवडणूक प्रक्रिया रविवारी (ता. ३) पार पडली. या निवडणूक प्रक्रियेवर सोसायटी सदस्य आणि रहिवाशांनी आक्षेप घेतला आहे. निवडणूक प्रक्रियेत कोणत्याही प्रकारचे नियम पाळले नाहीत. याप्रकरणी आम्ही न्यायालयात जाणार आहोत, असे सोसायटी सदस्यांनी या वेळी प्रसिद्धीमाध्यमांशी बोलताना सांगितले.

डोंबिवलीजवळील प्रसिद्ध कासा रिओ व कासा गोल्ड को-ऑप. हाउसिंग सोसायटी अंतर्गत २१० इमारती आहेत. यामध्ये ३९ सोसायटी रजिस्टर असून, १० हजार ७०० फ्लॅटधारक येथे राहतात. दरम्यान, या कासा रिओ व कासा गोल्ड को-ऑप. हाउसिंग सोसायटीची रविवारी निवडणूक प्रक्रिया पार पडली. या निवडणुकीवर सोसायटीमधील सदस्य आणि रहिवाशांनी आक्षेप घेतला आहे. दरम्यान, याबाबत सोसायटीमधील सदस्य समीर कोंडालकर आणि वल्लभकांत पांडे यांनी सांगितले, की निवडणुकीची संपूर्ण प्रक्रिया अपारदर्शक आहे. उपनिबंधकाकडे आक्षेप नोंदवूनसुद्धा त्याकडे लक्ष दिले नाही.

उपनिबंधकांकडे पत्र दिले होते, की आमचे बायलॉज पहिले रिपेअर करा आणि मग निवडणुका लावा. तसेच डिफॉल्टरची लिस्ट पब्लिश करायला पाहिजे होती, ती पब्लिश न करता निवडणुका लावल्या आहेत. जे सोसायटीमध्ये सदस्य नाहीत ते या निवडणुकीत उभे आहेत. या निवडणुकीत कुठल्याही प्रकारचे नियम पाळले गेले नाही आहेत. एकूण ३९ प्रतिनिधी सभासद असताना त्यातून २१ सदस्यांची मॅनेजिंग कमिटी तयार करण्याचा प्रस्ताव ठेवला आहे. तो स्पष्टपणे महाराष्ट्र सहकारी संस्था अधिनियम १९६० व मॉडेल बाय-लॉजच्या विरोधात आहे. कायद्याप्रमाणे मॅनेजिंग कमिटीचे सदस्यसंख्येचे प्रमाण एकंदर जनरल बॉडीच्या तुलनेत मर्यादित असावे लागते. त्यामुळे या बाबतीत कायदेशीर वैधतेचा प्रश्न निर्माण झाला आहे, असे सोसायटीमधील सदस्यांकडून सांगण्यात आले आहे.

निवडणूक अधिकारी श्रीकांत पाटील म्हणाले, की माझ्याकडे आलेली यादी डिफॉल्टरची आहे, आउटस्टँडिंगची नाही. अशा संस्थांवर कुठल्याही प्रकारची सहकार कायद्यातील तरतुदीप्रमाणे कारवाई झालेली नाही. त्यामुळे डिफॉल्टच्या व्याख्यामध्ये ती येत नाही. माझ्याकडे अंतिम यादी दिल्यानंतर अंतिम यादीत ज्यांची नावे समाविष्ट आहेत त्यांचे निवडणुकीमध्ये नॉमिनेशन करणे किंवा त्यांना मतदान करू देणे हे माझे कर्तव्य आहे.