उल्हासनगर, ता. ४ (वार्ताहर) : उल्हासनगरमधील कॅम्प ५ परिसरात सध्या सुरू असलेल्या रस्ते कामामुळे नागरिकांमध्ये काहिसी भीती, तर कुठे संताप व्यक्त होत आहे. हिललाइन पोलिस ठाण्यासमोर सुरू असलेल्या कामामुळे रस्ता खचण्याची आणि अपघाताची भीती असल्याने नागरिकांमध्ये नाराजीचा सूर उमटला आहे.
शहराच्या रस्त्यांची अवस्था सुधारावी, ही प्रत्येक नागरिकाची अपेक्षा असते. कॅम्प ५ मध्ये सुरू असलेले रस्त्याचे काम नागरिकांच्या जखमेवर मीठ चोळणाऱ्यासारखे ठरत आहे. हिललाइन पोलिस ठाणे आणि इंडसलँड बँकेसमोरील मोठा नाला समोर असतानाही त्याचे कोणतेही दुरुस्तीकरण किंवा मजबुतीकरण न करता थेट रस्त्यांचे काम सुरू करण्यात आले आहे. परिणामी, भविष्यात रस्ता खचण्याचा धोका निर्माण झाला असून, अपघाताची शक्यता नाकारता येत नाही. तरीही प्रशासनाकडून दुर्लक्ष केले जात आहे.
हे काम वर्षभरापासून रखडलेले आहे. आज संपूर्ण परिसरात रस्ते उखडलेले, खड्डेच खड्डे, अपूर्ण सांडपाणी वाहिनी प्रणाली आणि असुविधांचा अमाप त्रास नागरिक सहन करत आहेत. नागरिकांनी प्रशासनाकडे स्पष्टपणे मागणी केली आहे की, फक्त वरवरचा रस्ता न करता रस्त्याच्या तळाशी असलेल्या नाल्याचे संपूर्ण मजबुतीकरण करावे. नाला जर कमकुवत राहिला, तर वरचा रस्ता कितीही चांगला असला, तरी तो लवकरच खचेल. यामुळे अपघात होतील. दुर्घटना घडल्यास त्याला जबाबदार कोण राहणार? असा सवाल उपस्थित केला जात आहे.