अंबरनाथ, ता. ४ (वार्ताहर) : शहरात वीजचोरीच्या घटनांमध्ये दिवसेंदिवस वाढ होत चालल्याने महावितरणच्या अधिकाऱ्यांची डोकेदुखी वाढली आहे. अंबरनाथ तालुक्यात मोठ्या प्रमाणात अनधिकृत वीज वापर केला जात आहे. महावितरणकडून याची तपासणी मोहीम हाती घेण्यात आली आहे. तपासणीत तीन लाखांची वीजचोरी झाल्याचे स्पष्ट झाले असून, संबंधित आरोपींविरुद्ध अंबरनाथ पोलिस ठाण्यात गुन्हे दाखल करण्यात आले आहे.
शहरात व ग्रामीण भागात अनेक बेकायदा वीजजोडण्या उघडकीस आल्या आहेत. महावितरणच्या विशेष पथकाने काही दिवसांत विविध ठिकाणी धाडसत्र राबवले. यामध्ये घरगुती, व्यावसायिक व औद्योगिक वीजजोडणीचा गैरवापर केल्याचे निदर्शनास आले. अंबरनाथ तालुक्यातील ग्रामीण भागात वीज चोरून वापरणाऱ्या दोन ग्राहकांवर अंबरनाथ पोलिस ठाण्यात गुन्हा दाखल झाला आहे. ही वीजचोरी तब्बल तीन लाखांची असून, दोन्ही ग्राहकांवर गुन्हे दाखल झाले आहेत. वासीम शब्बीर बुबरे हा वांगणी येथील गोरेगाव येथील तर तुषार चव्हाण हा बदलापूरजवळील कर्जत महामार्गावर राहणारा आहे. या दोन्ही ग्राहकांनी महावितरणचे एकूण १० हजार ३२४ युनिटची वीजचोरी केली आहे. याप्रकरणी महावितरणचे कल्याण भरारी पथकाचे अतिरिक्त कार्यकारी अभियंता प्रमोद नामदेवराव दुधाळे यांच्या तक्रारीवरून अंबरनाथ पोलिस ठाण्यात गुन्हा दाखल केला आहे.