वसई, ता. ४ (बातमीदार) : पालघर जिल्ह्यात गेल्या काही महिन्यांपासून बनावट औषध, बोगस डॉक्टरांचा सुळसुळाट, तसेच दवाखान्यांत महाराष्ट्र प्रदूषण नियंत्रण मंडळाकडील प्रमाणपत्र आणि जैववैद्यकीय कचरा व्यवस्थापन प्रमाणपत्र नसल्याचे प्रकार उघडकीस होऊ लागले आहेत. त्यामुळे महापालिका प्रशासनाने धाडसत्र सुरू केले आहे. पालघर जिल्हा औषध विभागानेदेखील या प्रकारावर लक्ष केंद्रित केले आहे. त्यामुळे यापुढे औषध खरेदी थेट कंपनीकडून करण्याचा निर्णय घेण्यात येणार असल्याचे प्रशासनाने स्पष्ट केले आहे.

रग्णांच्या सेवेसाठी वसई-विरार महापालिकेची इस्पितळे, आरोग्य केंद्रे आहेत. या ठिकाणी नागरिकांना मोफत औषध दिले जातात, परंतु यात बनावट औषधांनी शिरकाव केल्याचे समोर आले होते, तर दुसरीकडे वसईत एका खोलीमधून औषधविक्री होत असल्याचा धक्कादायक प्रकार समोर आला होता. याप्रकरणी पालघर जिल्हा औषध विभागाचे सहाय्यक आयुक्त महेश गाडेकर यांनी कारवाई केली होती. यानंतर औषधे जप्त करण्यात आल्यावर दुकाने सील करण्यात आली. औषधांचे नमुने विश्लेषणासाठी शासकीय प्रयोगशाळेत पाठवण्यात आले, अशी माहिती गाडेकर यांनी दिली.

एकीकडे डॉक्टर विश्वास ठेवून औषधे घेऊन रुग्णांना देतात, परंतु बनावट, परवाना नसलेले औषधविक्री होत असल्याने आरोग्य सुरक्षेचा प्रश्न निर्माण होऊ शकतो, म्हणून वसई-विरार महापालिकेच्या रुग्णालयांसाठी लागणारी औषधे कंत्राटदारामार्फत न घेता थेट त्या-त्या कंपनीकडून खरेदी करण्याचा निर्णय आयुक्त मनोज कुमार सूर्यवंशी घेणार आहेत, जेणेकरून प्रशासनाच्या निधीची बचत होईल व नागरिकांना आरोग्य सुरक्षेची हमी मिळू शकते.

दुसरीकडे महापालिका कार्यक्षेत्रात अवैध वैद्यकीय व्यावसायिक सराव करत असल्याबाबत घटना उघडकीस येत आहेत. या अनुषंगाने धडक मोहीम राबविण्यात येत आहे. यामध्ये जे अवैध वैद्यकीय व्यवसाय करताना आढळतील, त्यांच्यावर कारवाई करण्यात येत आहे. संतोष भुवन, चिंचोटी, कामण परिसरात बनावट दवाखाने आढळून आले आहेत. या ठिकाणी रुग्ण तपासणी करत त्यांना औषधे देताना कथित डॉक्टर आढळून आले. अवैध वैद्यकीय व्यावसायिकांवर आळा घालण्यासाठी धाडसत्र सुरूच राहणार असून, महापालिका कार्यक्षेत्र बोगस डॉक्टरमुक्त करण्याचे आव्हान प्रशासनाने स्वीकारून पालिकेचे वैद्यकीय आरोग्य विभाग कार्यरत राहणार आहे, असे स्पष्ट केले.

प्रशासनाकडून पथक तयार
महापालिका क्षेत्रात बोगस डॉक्टर, बनावट औषध आणि विनापरवाना औषध विक्री अशा घटना नागरिकांच्या जीवावर बेतू शकतात. त्यामुळे महापालिकेचा आरोग्य विभाग व पालघर जिल्हा औषध प्रशासन विभागाने करडी नजर ठेवण्यास सुरुवात केली आहे. महापालिकेच्या वैद्यकीय आरोग्य अधिकारी डॉ. भक्ती चौधरी, उपवैद्यकीय आरोग्य अधिकारी डॉ. अनिरुद्ध भेले, डॉ. स्मिता वाघमारे, डॉ. पूजा गुप्ता, डॉ. शाहीन शेख आणि वैद्यकीय आरोग्य विभाग व नागरी प्राथमिक आरोग्य केंद्राचे कर्मचारी अशा दवाखान्याची तपासणी करत आहेत.

जैववैद्यकीय कचऱ्याचे आव्हान
जे दवाखाने महापालिकेकडे नोंदणीकृत नाहीत, अशांवर महाराष्ट्र प्रदूषण नियंत्रण मंडळाकडील प्रमाणपत्र आणि जैववैद्यकीय कचरा व्यवस्थापन हे प्रमाणपत्र नसल्याचे आढळून आले. त्यामुळे अशा दवाखान्यांत जैववैद्यकीय कचऱ्याची विल्हेवाट कशा प्रकारे करण्यात येते, याबाबत प्रश्न निर्माण होत आहे.

वसई-विरार शहरातही बोगस डॉक्टर आढळून आले आहेत. त्यांच्यावर आरोग्य विभागाकडून कारवाई करण्यात येत आहे, तर औषधाचा साठा हा महापालिकेच्या इस्पितळ आणि आरोग्य केंद्रात हवा असल्याने त्यांची खरेदी औषध कंपन्यांकडून करण्याचा निर्णय घेऊ. त्यामुळे निधीचीदेखील बचत होईल.
- मनोजकुमार सूर्यवंशी, आयुक्त, वसई-विरार महापालिका