आपतर्फे जिल्हाधिकारी कार्यालयासमोर आंदोलन
खोपोलीतील शाळेसमोरील टर्फ मैदान हटविण्याची मागणी
अलिबाग, ता. ४ (वार्ताहर) ः खोपोलीतील शाळेसमोरील टर्फ मैदान हटविण्याच्या मागणीसाठी आपतर्फे जिल्हाधिकारी कार्यालयासमोर आंदोलन करण्यात आले आहे.
खोपोली नगर परिषद हद्दीतील प्रभाग क्रमांक सहा येथील एका शाळेच्या समोरील मैदानावर नगर परिषदेमार्फत अनधिकृत क्रिकेटचे टर्फ ग्राउंड बनवण्यात आले आहे. या मैदानातून टाटा पॉवर व मध्य रेल्वेची उच्चदाबाची विद्युतवाहिनी जात आहे. त्यामुळे या ठिकाणी टर्फ ग्राउंड बनवल्यास विद्यार्थ्यांच्या जीवाला धोका होऊ शकतो. म्हणून या मैदानावर फक्त लॉन टाकण्यात यावे, ज्यामुळे मैदान सर्व खेळांसाठी उपयुक्त होईल, अशी मागणी आम आदमी पार्टीने नगर परिषदेला केली होती, परंतु नगर परिषदेमार्फत या मैदानाचे ७० टक्के काम पूर्ण झाले असून, आता काम थांबवणे अशक्य असल्याचे उत्तर देऊन डावलण्यात आले होते. याविरोधात ‘आप’तर्फे जिल्हाधिकारी कार्यालयासमोर सोमवारी (ता. ४) एकदिवसीय धरणे आंदोलन करण्यात आले. टर्फ बांधकामाकरिता नगर परिषदेने अनियमितता केलेली आहे. टाटा पॉवर व मध्य रेल्वेची परवानगी घेतली नाही व नागरिकांच्या कराचे ७० लाख रुपये बुडवले व आपल्या पदाचा दुरुपयोग केला म्हणून खोपोली नगर परिषदेचे मुख्याधिकारी तथा प्रशासक यांची चैकशी करावी, अशी मागणी केल्याचे आम आदमी पार्टी प्रदेश संघटन सचिव डॉ. पठाण यांनी सांगितले. या आंदोलनाकरिता पार्टीचे रायगड जिल्हाध्यक्ष ॲड. जयसिंग शेरे, जिल्हा संघटन सचिव चिमाजी शिंदे, अलिबाग तालुका अध्यक्ष ॲड. अजय उपाध्ये, पक्षाचे वरिष्ठ नेते मनोज घरत, खोपोली शहराध्यक्ष ग्यासुद्दीन खान, खालापूर तालुका उपाध्यक्ष कस्तुरचंद राठोड, खोपोली शहर उपाध्यक्ष परमेश्वर कट्टीमनी, किशोर पाटील आदी उपस्थित होते.