विद्युत केबलला आग
ठाणे, ता. ४ : वर्तकनगर येथे इमारतीच्या तिसाव्या मजल्यावर विद्युत केबलला आग लागल्यांची घटना घडली होती. ही घटना सोमवारी (ता.४) सकाळी सात वाजता समोर आली.
वर्तकनगर, पोखरण रोड क्रमांक एक या ठिकाणी असलेल्या हब-टाऊन ग्रीन वूड सोसायटीच्या सी विंग या तळ अधिक ३० मजली इमारतीच्या तिसाव्या मजल्यावर इलेक्ट्रिक डक्टमधील विद्युत केबलला किरकोळ आग लागली होती. या घटनेची माहिती मिळताच घटनास्थळी अग्निशमन दलाच्या जवानांनी धाव घेत, तात्काळ आगीवर नियंत्रण मिळविले. अशी माहिती आपत्ती व्यवस्थापन कक्षेने दिली. या घटनेची माहिती मिळताच अग्निशमन दलाच्या जवानांनी घटनास्थळी धाव घेत तात्काळ आगीवर नियंत्रण मिळविले, अशी माहिती आपत्ती व्यवस्थापन कक्षेने दिली.

.....
मांजरीच्या पिल्लाची सुखरूप सुटका
ठाणे : लुईसवाडी या ठिकाणी राजहंस सोसायटीसमोर रस्त्याशेजारी पार्क केलेल्या एका चारचाकीच्या बोनेटमध्ये मांजरीचे पिल्लू अडकले होते. त्या पिल्लाची आपत्ती व्यवस्थापन कर्मचाऱ्यांनी सुखरूप सुटका केली. ही घटना सोमवारी (ता.४) दुपारी सव्वाएक वाजण्याच्या सुमारास समोर आली, अशी माहिती आपत्ती व्यवस्थापन कक्षेने दिली.
..............

ठाण्यात शुक्रवारी अभिनेते अमोल पालेकर यांची मुलाखत
ठाणे : मराठी ग्रंथ संग्रहालय, ठाणे यांच्या वतीने आयोजित रौप्य महोत्सव विशेष वाचन कट्टा कार्यक्रमात प्रख्यात अभिनेते, दिग्दर्शक आणि लेखक अमोल पालेकर यांची खास मुलाखत होणार आहे. शुक्रवारी (ता. ८) संध्याकाळी ६ वाजता ठाण्यातील ग्रंथालयाच्या व. अ. रेगे सभागृहात हा कार्यक्रम आयोजित केला आहे.
यावेळी अमोल पालेकर यांच्या बहुचर्चित आत्मचरित्र ‘ऐवज’ या पुस्तकावरील मनोज्ञ संवाद घडणार असून, त्यांच्यासोबत लेखिका संध्या गोखले सहभागी होणार आहेत. दोघांमध्ये होणाऱ्या मुक्त संवादातून पालेकर यांच्या रंगभूमी, सिनेमा, लेखन आणि जीवन प्रवासाच्या विविध पैलूंवर प्रकाश टाकला जाणार आहे. हा कार्यक्रम विनामूल्य आणि सर्वांसाठी खुला असून, ग्रंथप्रेमींनी मोठ्या संख्येने उपस्थित राहावे, असे आवाहन ग्रंथालयाचे अध्यक्ष विद्यासागर ठाणेकर यांनी केले आहे.