अत्याचार प्रकरणातील आरोपीला तीन महिन्यांनंतर अटक
सकाळ वृत्तसेवा
डोंबिवली, ता. ४ : एका १३ वर्षीय अल्पवयीन मुलीवर अत्याचार करून पळून गेलेल्या रिक्षाचालकाला तब्बल तीन महिन्यांनंतर विष्णूनगर पोलिसांनी अटक केली आहे. आकाश कुराडे (वय ३२) असे या आरोपीचे नाव असून, त्याला डोंबिवली पूर्वेतून अटक करण्यात आली आहे. ही घटना विष्णूनगर पोलिस ठाण्याच्या हद्दीत घडली होती.

संबंधित अल्पवयीन पीडित मुलगी घराबाहेर खेळत असताना त्याच परिसरात राहणाऱ्या आरोपीने तिच्यावर अत्याचार केला होता. या घटनेनंतर आरोपी फरार झाला होता. मुलीच्या कुटुंबीयांच्या तक्रारीनंतर विष्णूनगर पोलिसांनी तत्काळ गुन्हा दाखल केला. तसेच आरोपीच्या शोधासाठी विशेष तपास पथक स्थापन केले. विष्णूनगर पोलिस ठाण्याचे वरिष्ठ पोलिस निरीक्षक संजय पवार यांच्या मार्गदर्शनाखाली हे पथक आरोपीच्या हालचालीवर सतत लक्ष ठेवून होते. अखेर पोलिसांना खबऱ्यामार्फत आरोपी डोंबिवली पूर्वेतील सासुरवाडीत असल्याची माहिती मिळाली. त्या आधारे पोलिसांनी सापळा रचून आकाश कुराडेला ताब्यात घेतले. अटक आरोपी हा विवाहित असून, त्याला दोन छोटे मुले असल्याची पोलिसांनी सांगितले आहे. आरोपी आकाशला अटक करून कल्याण न्यायालयात हजर केले असता न्यायालयाने त्याला १४ दिवसांची न्यायालयीन कोठडी सुनावल्याची माहिती वरिष्ठ पोलिस निरीक्षक संजय पवार यांनी दिली.