अवयवदानासाठी झेडपीचा पुढाकार
सकाळ वृत्तसेवा
ठाणे, ता. ४ : अवयवदान सप्ताहानिमित्त जिल्हा परिषदेच्या आरोग्य विभागाच्या वतीने जनजागृतीसाठी ३ ऑगस्ट ते १५ ऑगस्टपर्यंत विविध उपक्रम आयोजित केले आहेत. अवयवदानाचे महत्त्व पटवून देण्यासाठी शैक्षणिक सत्रे, चर्चासत्र, जनजागृती रॅली, पोस्टर प्रदर्शन व वैद्यकीय मार्गदर्शन शिबिरे आयोजित करण्यात येणार आहेत. या उपक्रमांचा उद्देश म्हणजे समाजात अवयवदानाविषयी सकारात्मक विचारसरणी निर्माण करणे आणि गरजू रुग्णांना जीवनदान मिळवून देण्यासाठी नागरिकांचा सक्रिय सहभाग मिळवणे.
दरवर्षी हजारो रुग्ण किडनी, लिव्हर, हृदय, फुप्फुसे इत्यादी अवयवांच्या प्रत्यारोपणासाठी प्रतीक्षा यादीत राहतात. एका व्यक्तीच्या अवयवदानाने आठ जणांपर्यंतचे प्राण वाचू शकतात. त्यामुळे अवयवदान ही केवळ वैद्यकीय प्रक्रिया नसून, ती एक श्रेष्ठ सामाजिक आणि मानवी मूल्यांची अभिव्यक्ती आहे. जिल्हा परिषदेचे मुख्य कार्यकारी अधिकारी रोहन घुगे यांनी या वेळी सांगितले, की मृत्यूनंतर अवयवदान करून आपण अनेक जीवांना पुन्हा नवसंजीवनी देऊ शकतो. प्रत्येक नागरिकाने अवयवदानाचा निर्णय घेऊन कुटुंबासोबत याविषयी संवाद साधावा. तर जिल्हा आरोग्य अधिकारी डॉ. गंगाधर परगे यांनी अवयवदान ही एक संवेदनशील आणि सशक्त सामाजिक जबाबदारी आहे. वैद्यकीय दृष्टिकोनातून पाहता, वेळेवर मिळालेला अवयव एखाद्या रुग्णाचे जीवन वाचवू शकतो. त्यामुळे नागरिकांनी अवयवदानासंदर्भात भीती किंवा गैरसमज बाजूला ठेवून माहितीपूर्ण निर्णय घ्यावा, असे त्यांनी सांगितले.
दरम्यान, अवयवदान ही आपल्या इच्छेने आणि जागरूकतेने घ्यायची सामाजिक जबाबदारी आहे. आपण स्वतः पुढाकार घेतल्यास आपल्या कृतीमधून इतरांनाही प्रेरणा मिळू शकते. आरोग्य विभागाच्या वतीने सर्व शासकीय कार्यालये, शाळा, महाविद्यालये, स्वयंसेवी संस्था आणि वैद्यकीय क्षेत्रातील प्रतिनिधींनी यामध्ये सक्रिय सहभाग नोंदवावा, असे आवाहन केले.