भांडुपमध्ये विधी महाविद्यालयाचे उद्‌घाटन
ईशान्य मुंबईतील कायद्याच्या विद्यार्थ्यांना दिलासा
मुलुंड, ता. ४ (बातमीदार) ः भांडुप पश्चिमेत सिद्धिविनायक शिक्षण प्रसारक मंडल संचालित आर. के. विधि महाविद्यालयाचे उद्‌घाटन शुक्रवारी (ता. १) मोठ्या उत्‍साहात पार पडले. ईशान्य मुंबईतील या नवीन विधी महाविद्यालयामुळे कायद्याचे शिक्षण घेणाऱ्या विद्यार्थ्यांना दिलासा मिळाला आहे.
संस्थेचे संस्थापक, संचालक रमेश खानविलकर यांनी गेल्‍या ३१ वर्षात संस्थेने महाराष्ट्रात सुरू केलेल्या अनेक शाळा, विद्यालये, व्यावसायिक, शैक्षणिक संस्थांची माहिती देऊन भविष्यात कोकणात मोठे शैक्षणिक संकुल उभे राहणार आहे. ज्याचा फायदा संपूर्ण कोकणवासीयांना पर्यायाने महाराष्ट्राला होईल असे सांगितले.
या वेळी केंद्रीय सामाजिक राज्यमंत्री रामदास आठवले, पद्मश्री व नवनिर्वाचित राज्यसभा सदस्य अ‍ॅड. उज्‍ज्वल निकम, रोजगार हमी योजना व फलोत्पादन मंत्री भरत गोगावले, बार कौन्सिल ऑफ महाराष्ट्र, गोवा अध्यक्ष विठ्ठल कोंडे देशमुख यांच्यासह रिद्धेश खानविलकर आदींची उपस्‍थिती होती. या वेळी रमेश खानविलकर यांच्या ‘दी स्टॉर्मी पाथ’ या इंग्रजी पुस्तकाचे प्रकाशन करण्यात आले. या नवीन विधी महाविद्यालयाचा फायदा कायद्याच्या विद्यार्थ्यांना होईल, उत्तम शिक्षण दिले जाईल, अशा शब्‍दांत मान्यवरांनी आपले मनोगत व्यक्‍त केले.