सीवूड्समध्ये उंच होर्डिंग्जमुळे अपघाताची भीती
धोकादायक होर्डिंग्ज हटवण्याची महापालिकेकडे मागणी
तुर्भे, ता. ४ (बातमीदार) : सीवूड्स पूर्व व पश्चिमेला जोडणाऱ्या उड्डाणपुलाच्या पश्चिम बाजूला २० फुटांपेक्षा उंच असलेल्या जाहिरात फलकांमुळे स्थानिक नागरिकांमध्ये भीतीचे वातावरण निर्माण झाले आहे. या महाकाय आणि उंच होर्डिंग्जमुळे दुर्घटनेची शक्यता असल्याने हे होर्डिंग्ज त्वरित हटवावे, अशी जोरदार मागणी नागरिकांनी नवी मुंबई महापालिकेकडे केली आहे.
देशभरात आणि विशेषतः महाराष्ट्रात उंच आणि अस्थिर जाहिरात फलक कोसळून अपघात होण्याच्या घटना वारंवार घडल्या आहेत. काही प्रकरणांमध्ये निष्पाप नागरिकांचा जीवही गेला आहे. या पार्श्वभूमीवर राज्य सरकारने उंच, धोकादायक होर्डिंग्ज हटवण्याचे स्पष्ट आदेश संबंधित महापालिकांना दिले आहेत. या आदेशाच्या अंमलबजावणीअंतर्गत नवी मुंबई महापालिकेने अनेक ठिकाणी अनधिकृत होर्डिंग्ज हटवलेही आहेत. मात्र सीवूड्स परिसरातील उंच टोलेजंग होर्डिंग अजूनही जागच्या जागीच असल्याने नागरिकांमध्ये संतापाचे आणि अस्वस्थतेचे वातावरण आहे.
स्थानिक रहिवासी आणि सामाजिक कार्यकर्ते प्रकाश पालांडे यांनी याबाबत चिंता व्यक्त करीत सांगितले, की होर्डिंग्ज केवळ भव्यतेसाठी उभारण्यात येतात, पण त्यांच्या देखभालीकडे दुर्लक्ष केले जाते. जाहिरात बदलताना सुरक्षिततेच्या दृष्टीने कोणतीही विशेष काळजी घेतली जात नाही. अशा परिस्थितीत नागरिकांच्या जीविताला धोका पोहोचतो.
.................
सीवूड्स हावरे मॉलजवळदेखील अशाच प्रकारचे उंच होर्डिंग लावण्यात आले आहे. जोरदार वारे, पावसाळी हवामान आणि शहरातील उंच इमारतींच्या वाऱ्याच्या प्रभावामुळे अशी होर्डिंग कोसळण्याचा धोका अधिक असतो. काही वेळा या फलकांचा अंश रस्त्यावर पडल्यास गंभीर अपघात होऊ शकतो. त्यामुळे सार्वजनिक ठिकाणी अशा उंच आणि अस्थिर जाहिरात फलकांना परवानगी देणे चुकीचे ठरेल, असे स्थानिकांनी स्पष्ट केले.
...................