श्रावणोत्सवात उत्साहात रंगली मंगळागौर
डॉक्टरांनी जिंकली स्पर्धा, ‘ऑपरेशन सिंदूर’च्या माध्यमातून देशभक्तीचा जागर
पनवेल, ता. ४ (बातमीदार) ः महाराष्ट्राच्या सांस्कृतिक परंपरेचा अमूल्य ठेवा असलेल्या मंगळागौरीच्या खेळांना उजाळा देत दिशा महिला व्यासपीठाच्या वतीने पनवेलमध्ये पारंपरिक आणि आधुनिकतेचा संगम साधणारा मंगळागौर महोत्सव उत्साहात पार पडला. आद्य क्रांतिवीर वासुदेव बळवंत फडके नाट्यगृहात आयोजित या कार्यक्रमाला महिलांचा मोठा प्रतिसाद लाभला. विविध खेळ, गाणी, नृत्य, सौंदर्यस्पर्धा, आणि देशभक्तिपर संदेशाने सजलेल्या या सोहळ्यात डॉक्टर महिलांच्या ग्रुपने प्रथम क्रमांक पटकावून सर्वांचे लक्ष वेधले.
श्रावण महिन्यातील मंगळागौर उत्सव म्हणजे स्त्रियांसाठी आनंद, उत्सव आणि पारंपरिक मूल्यांचा संगम. पूजाविधी, गाणी, खेळ, हास्यविनोद, खाणेपिणे आणि मैत्रिणींबरोबर जागरण यामुळे हा उत्सव महिलांच्या मनात खास स्थान पटकावतो. या उत्सवाच्या निमित्ताने महिलांना व्यासपीठ उपलब्ध करून देण्याच्या उद्देशाने दिशा महिला व्यासपीठाच्या संस्थापिका नीलम आंधळे यांनी गेली अनेक वर्षे श्रावण महोत्सवाचे आयोजन सुरू ठेवले आहे.
यंदाही रायगड श्रावण सम्राज्ञी स्पर्धेचा समावेश कार्यक्रमात करण्यात आला होता. मयुरी साळे यांनी ‘रायगड श्रावण सम्राज्ञी’चा किताब पटकावला. कविता राऊत आणि करिष्मा झांबरे यांना उपविजेतेपद मिळाले. स्वामिनी मंगळागौर ग्रुप व हिरकणी ग्रुपने अनुक्रमे दुसरा व तिसरा क्रमांक मिळवला. गौरीधारी अक्षर ग्रुपला उत्तेजनार्थ बक्षीस प्रदान करण्यात आले. या वेळी खास आकर्षण ठरले ते कामोठे व पनवेल येथील डॉक्टर्सनी वैद्यकीय क्षेत्रातील व्यस्ततेतून वेळ काढून स्पर्धेत सहभाग घेत उत्तम सादरीकरण केले. त्यांनी आरोग्यविषयक संदेश देणारी मंगळागौर सादर करत प्रेक्षकांची मने जिंकली. यासोबतच उपस्थित महिलांनी पारंपरिक वेशभूषा, नृत्य आणि खेळांमधून आपली सर्जनशीलता दाखवली. कार्यक्रमाच्या प्रमुख पाहुण्यांमध्ये महेंद्र घरत, इंदू झा, माजी नगरसेवक विकास घरत, निता माळी, साहिल शाह आदींचा समावेश होता. तसेच अभिनेते आनंदा कारेकर आणि लावणी सम्राट आशिमिक कामठे यांनी आपल्या सादरीकरणाने कार्यक्रमात रंगत आणली.
................
‘ऑपरेशन सिंदूर’चा संदेश!
महिलांच्या शौर्याचा गौरव करणाऱ्या ‘ऑपरेशन सिंदूर’ उपक्रमाच्या माध्यमातून दिशा महिला व्यासपीठाने या कार्यक्रमात देशभक्तीचा संदेश दिला. पहेलगाम हल्ल्यानंतर भारतीय लष्कराने दिलेल्या प्रत्युत्तराचा दाखला देत दोन महिला अधिकारी कार्यक्रमात सहभागी झाल्या. ‘वॉक फॉर नेशन’च्या माध्यमातून महिलांचे कर्तृत्व अधोरेखित करण्यात आले.