खारघर, ता. ४ (बातमीदार) : खारघर कॉलनी फोरमच्या प्रयत्नांमुळे सेक्टर १२मधील एका मालमत्ताधारकाला महाराष्ट्र महापालिका अधिनियम कलम १२९ ए अन्वये मालमत्ता करात ८० हजारांची सवलत मिळाली आहे. या नियमानुसार जास्तीत जास्त सिडको वसाहतधारकांना सवलत मिळावी, यासाठी कॉलनी फोरमकडून प्रयत्न केले जाणार आहेत.
खारघर सेक्टर १२ मध्ये वास्तव्यास असलेल्या रवींद्र कटकदौंड यांना पालिकेने एक लाख सहा हजार ३६१ रुपयांचा मालमत्ता कर भरण्याची नोटीस पाठविली होती. कटकदौंड सेक्टर १२मध्ये अनेक वर्षांपासून वास्तव्यास असल्यामुळे ग्रामपंचायत काळात त्यांनी मालमत्ता कराचा भरणा केला होता. महापालिकेच्या नियमानुसार सिडको क्षेत्र वगळून पूर्वाश्रमीच्या जिल्हा परिषदेच्या क्षेत्रातील समावेश असलेल्या महाराष्ट्र महापालिका अधिनियम कलम १२९ ए अन्वये सिडको वसाहतीमधील मालमत्ता धारकांना मालमत्ता करात सवलत दिली जाते. याच अनुषंगाने मालमत्ताधारक कटकदौंड, कॉलनी फोरमच्या अध्यक्षा लीना गरड यांनी पालिका आयुक्ताची भेट घेत महापालिका अधिनियम कलम १२९ ए निदर्शनास आणून दिला होता. या नियमानुसार एक लाख सहा हजार ३६१ वरून जवळपास ८० टक्के सवलत मिळाल्यामुळे २१,३८८ हजार रुपये भरणा करावा लागणार आहे. या नियमानुसार अडीच लाख मालमत्ताधारकांना फायदा होणार असल्याचा दावा लीना गरड यांनी केला आहे.
़़़़़़़ः-----------------------------------
खारघर ग्रामपंचायत असताना मालमत्ता कराचा भरणा केला होता. पालिकेने लागू केलेल्या महापालिका अधिनियम कलम १२९ ए नुसार जवळपास ८० टक्क्यांपेक्षा अधिक लाभ झाला आहे. ज्या मालमत्ताधारकांनी ग्रामपंचायत काळात मालमत्ता कराचा भरणा केला आहे अशा मालमत्ताधारकांना अशी सवलत मिळू शकते.
- रवींद्र कटकदौंड, रहिवासी, सेक्टर १२ खारघर