वसई, ता. ४ (बातमीदार) : गणेशोत्सवाला केवळ २३ दिवसांचा कालावधी शिल्लक असताना महापालिका प्रशासनाला मूर्तिकारांना शाडूच्या मातीचे वाटप करण्यासाठी वेळ मिळाली आहे. महापालिकेने पर्यावरणपूरक मूर्ती व कृत्रिम तलाव अशी संकल्पना हाती घेतली आहे, याचाच एक भाग म्हणून विनामूल्य शाडूची माती मूर्तिकारांना वाटप करण्याचा उपक्रम हाती घेतला आहे.

पर्यावरणपूरक गणेशोत्सव साजरा करण्याच्या उद्देशाने महापालिकेने शहरातील मूर्तिकारांना शाडूच्या मातीच्या मूर्तींची निर्मिती करण्याचे आवाहन केले होते. यासाठी मूर्तिकारांना महापालिकेमार्फत विनामूल्य शाडूची माती पुरविण्याचे व ज्यांना शाडूची मातीची आवश्यकता असेल, त्यांनी तसे मागणीपत्र देण्याचे आवाहन महापालिकेमार्फत करण्यात आले होते. या आवाहनाला प्रतिसाद देत वसई-विरार मूर्तिकार संघटनेमार्फत महापालिकेला शाडूची माती मिळण्याबाबत मागणीपत्र प्राप्त झाली होती. त्यामुळे पालिकेमार्फत मूर्तिकारांना विनामूल्य शाडूच्या मातीचे वाटप करण्यात आले. प्रत्येक मूर्तिकाराला ४० गोणी यानुसार २५ मूर्तिकारांना एकूण एक हजार शाडूच्या मातीच्या गोणींचे वाटप करण्यात येत आहे. या वेळी महापालिकेचे अतिरिक्त आयुक्त दीपक सावंत, उपायुक्त अजित मुठे, मूर्तिकार व महापालिका कर्मचारी उपस्थित होते.