बदलापूरमधील डॉक्टरचा
दहशतवाद्यांशी संबंध?
उत्तर प्रदेश एटीएसकडून अटक; शुक्रवारपर्यंत ट्रान्सिट रिमांड
बदलापूर, ता. ४ (बातमीदार) : उत्तर प्रदेश दहशतवादविरोधी पथकाने (एटीएस) दहशतवादी संघटनेशी संबंध असल्याच्या संशयावरून बदलापूरमधील ओसामा शेख (वय ३०) या डॉक्टरला अटक केली आहे. उल्हासनगर न्यायालयाने त्याला शुक्रवारपर्यंत ट्रान्सिट रिमांड दिल्यानंतर उत्तर प्रदेश पोलिस त्याला घेऊन रवाना झाले. या कारवाईमुळे खळबळ उडाली आहे.

बदलापूर पूर्वेतील एका खासगी रुग्णालयात शेख हा डॉक्टर म्हणून सेवा बजावत होता. तेथून रविवारी त्याला ताब्यात घेण्यात आले होते. उत्तर प्रदेशमधील दहशतवादी कारवाईत आरोपी असलेल्या व्यक्तींना हा डॉक्टर ऑनलाइन मार्गदर्शन करीत असल्याची माहिती उघडकीस आली आहे. त्यामुळे दहशतवादी संघटनांशी या व्यक्तीचा थेट संबंध असल्याच्या संशयावरून उत्तर प्रदेश एटीएसने उपअधीक्षक सुशील सिंग यांच्या नेतृत्वाखाली ही कारवाई केली. या कारवाईनंतर संशयित आरोपी शेख याला उल्हासनगर न्यायालयात हजर करण्यात आले. न्यायालयाने त्याला शुक्रवारपर्यंत (ता. ८) ट्रान्सिट रिमांड मंजूर केला. त्यानंतर पोलिस त्याला ताब्यात घेऊन उत्तर प्रदेशला रवाना झाले. त्याला उत्तर प्रदेशमधील स्थानिक न्यायालयात सादर करण्यात येणार आहे.
दरम्यान, डॉक्टरचे आणखी काही साथीदार बदलापूर शहरात आणि आसपासच्या शहरांत आहेत का, यासंदर्भातला तपासही एटीएसकडून केला जाण्याची शक्यता वर्तविली जात आहे.
--