महाराष्ट्र राज्य नाट्य स्पर्धेसाठी ऑनलाइन प्रवेशिका उपलब्ध
मुंबई, ता. ४ : हौशी मराठी, हिंदी, संगीत व संस्कृत राज्य नाट्य स्पर्धांसाठी तसेच बालनाट्य स्पर्धा व दिव्यांग बालनाट्य स्पर्धा ३ नोव्हेंबरपासून सुरू होणार आहे. सांस्कृतिक कार्य संचालनायच्या वतीने दरवर्षी या स्पर्धा घेतल्या जातात. या स्पर्धेसाठी नाट्यसंस्थांकडून १ ते ३१ ऑगस्टपर्यंत ऑनलाइन पद्धतीने प्रवेशिका मागविण्यात येत आहेत. राज्यातील जास्तीत जास्त नाट्य संस्थांनी या स्पर्धेत आपला सहभाग नोंदवावा, असे आवाहन सांस्कृतिक कार्य संचालक विभीषण चवरे यांनी केले आहे. २२व्या महाराष्ट्र राज्य बालनाट्य स्पर्धेची प्राथमिक फेरी डिसेंबर २०२५पासून १० केंद्रांवर, तर ६४व्या हौशी हिंदी, संगीत व संस्कृत नाट्य स्पर्धेची अंतिम फेरी प्रत्येकी एका केंद्रावर डिसेंबर, २०२५ पासून आयोजित करण्यात येणार आहे. नोंदणीकृत हौशी नाट्य संस्थांना तसेच गतवर्षी राज्यनाट्य स्पर्धेत सहभागी झालेल्या नाट्य संस्थांना स्पर्धेसाठी विहित नमुन्यातील प्रवेशिका, नियम संचालनालयाच्या https://mahanatyaspardha.com या संकेतस्थळावर ऑनलाइन उपलब्ध होतील. आवश्यक त्या कागदपत्रांसह प्रवेशिका ३१ ऑगस्ट, २०२५ पर्यंत ऑनलाइन सादर करण्याचे आवाहन सांस्कृतिक कार्य संचालनालयाने केले आहे.