रक्षाबंधनाला ‘वस्त्र’मुळे पर्यावरणाचा स्पर्श
नवी मुंबई पालिकेचा उपक्रम, पुनर्प्रक्रिया प्रकल्पामध्ये इकोफ्रेंडली राखी
सकाळ वृत्तसेवा
नवी मुंबई, ता. ४ ः देशभरात उत्साहात साजऱ्या होणाऱ्या रक्षाबंधनासाठी नवी मुंबई पालिकेच्या वस्त्र पुनर्प्रक्रिया प्रकल्पामध्ये कापडापासून आकर्षक राख्या तयार करण्यात आल्या आहेत. या राख्यांचे वितरण सोमवारी (ता. ४) एका विशेष कार्यक्रमात नवी मुबंई महापालिकेतील अधिकारी तसेच कर्मचाऱ्यांना करण्यात आले.
केंद्र सरकारच्या वस्त्र मंत्रालयांतर्गत ‘वस्त्र पुनर्प्रक्रिया सुविधा प्रकल्प’ देशात पहिल्यांदाच सीबीडी बेलापूर येथे राबविण्यात येत आहे. या ठिकाणी वापरलेले टाकाऊ कपडे ठिकठिकाणाहून संकलित करून त्यावर पुनर्प्रक्रिया केली जाते. या केंद्रात शोभिवंत उपयोगी वस्तू व कापड तयार करून पुनर्वापरासाठी उपयोगात आणले जाते. रक्षाबंधनाचा सण लक्षात घेऊन या प्रकल्पात विविधरंगी आकर्षक कापडी राख्या बनवण्यात आल्या. त्याचा प्रचार होण्यासाठी महापालिका मुख्यालय, तसेच आठही विभाग कार्यालयात स्टॉल लावण्यात आले आहेत. या स्टॉल्सची तसेच वस्त्र पुनर्प्रक्रिया प्रकल्पाची माहिती प्रसारासाठी ‘इकोफ्रेंडली रक्षाबंधन’ हा अभिनव उपक्रम राबविण्यात आल्याचे घनकचरा व्यवस्थापन विभागाच्या उपआयुक्त स्मिता काळे यांनी सांगितले. या वेळी घनकचरा व्यवस्थापन विभागाचे उपआयुक्त डॉ. अजय गडदे, अतिक्रमण विभागाचे उपआयुक्त डॉ. कैलास गायकवाड आदी अधिकारीवर्ग उपस्थित होता.
-------------------------
रक्षाबंधनाला वस्त्र पुनर्प्रक्रिया प्रकल्पात तयार केलेल्या कापडी राख्या उपयोगासाठी नागरिकांना सहज उपलब्ध व्हाव्यात, याकरिता नवी मुंबई महापालिकेच्या प्रत्येक विभाग कार्यालयात, मुख्यालयात स्टॉल लावण्यात आले आहेत. या स्टॉलवर कापडी राख्यांप्रमाणेच प्रकल्पस्थळी बनविलेल्या विविध आकर्षक वस्तूही ठेवण्यात आलेल्या आहेत. तरी महिलांनी विभाग कार्यालयाला भेट देऊन त्या ठिकाणच्या इकोफ्रेंडली राख्यांमधून पर्यावरणपूरक सण साजरा करावा.
- डॉ. कैलास शिंदे, महापालिका, आयुक्त