आमदार, खासदारांचा अर्ज
न आल्यास घरे खुली होणार

सकाळ वृत्तसेवा
मुंबई, ता. ४ : सर्वसामान्यांचे गृहस्वप्न पूर्ण करणाऱ्या म्हाडाने कोकण मंडळाच्या सोडतीत ९० घरे आजी-माजी आमदारांसाठी राखीव ठेवली आहेत. या घरांसाठी अर्ज न आल्यास ती सर्वसाधारण प्रवर्गातील अर्जदरांसाठी उपलब्ध करण्यात येत असल्याचे म्हाडाने स्पष्ट केले आहे.

म्हाडाच्या (भू विनियोग) नियमानुसार सोडतीत एकूण घरांपैकी काही घरे विविध प्रवर्गांसाठी आरक्षित ठेवणे बंधनकारक आहे. त्यानुसार लोकसभा, विधानसभा आणि विधान परिषदेचे विद्यमान व माजी सदस्य या प्रवर्गासाठी दोन टक्के घरे राखीव ठेवण्याची तरतूद आहे. त्यानुसार प्रत्येक सोडतीत घरांच्या संख्येनुसार राखीव घरे ठेवली जातात. दरम्यान, या प्रवर्गासाठी आजी-माजी आमदार, खासदारांकडून अर्ज न मिळाल्यास त्यांच्यासाठी राखीव सदनिकांची बाब उच्चस्तरीय समितीच्या निदर्शनास आणून दिली जाते. तसेच प्रचलित कार्यपद्धतीनुसार ही घरे सर्वसाधारण जनता या प्रवर्गात समाविष्ट केली जातात, अशी माहिती म्हाडातर्फे देण्यात आली.