महावितरणच्या क्षेत्रात टोरंटची एंट्री?
आयोगासमोर आज सुनावणी

सकाळ वृत्तसेवा
मुंबई, ता. ४ : टोरंट कंपनीने महावितरणच्या कार्यक्षेत्र असलेल्या ठाणे, पालघर, पुणे आणि नागपूरच्या परिसरात समांतर वीज वितरण परवाना मिळावा म्हणून महाराष्ट्र वीज नियामक आयोगाकडे (एमईआरसी) अर्ज केला आहे. त्यावर मंगळवार (ता. ५) सकाळी ११ वाजता एमईआरसीसमोर जाहीर ई-सुनावणी होणार आहे.
महावितरणसह वीज कामगार संघटनांनी कडाडून विरोध करण्याचा निर्णय घेतला आहे. त्यामुळे सुनावणीनंतर आयोग काय निर्णय घेणार हे महत्त्वाचे ठरणार आहे. महावितरणकडून मुंबई वगळता संपूर्ण राज्यभरात वीज वितरण केले जाते. दरम्यान, टोरंट पाॅवर लिमिटेडने ठाणे आणि पालघर भौगोलिक क्षेत्रातील वसई विरार महापालिका, कल्याण डोंबिवली महापालिका, उल्हासनगर महापालिका, ठाणे महापालिका, अंबरनाथ नगरपालिका, पालघर आणि वाडा तालुक्याच्या सभोवतालच्या क्षेत्रासाठी वीज वितरण परवाना मंजूर करण्याकरिता दाखल केलेली ही याचिका आहे. तसेच पुणे जिल्ह्यातील काही भागांत आणि नागपूर महापालिका भौगोलिक क्षेत्र आणि नागपूर जिल्ह्यातील कामठी, हिंगणा, मौदा आणि कळमेश्वर क्षेत्रासाठी वीज वितरण परवाना मिळावा म्हणून अर्ज केला आहे. त्यावर मंगळवारी ई-सुनावणी होणार आहे.