ऐरोली नॉलेज पार्कमधील पादचारी पुलाची दयनीय अवस्था
अंधारासह उद्वाहक बंद अवस्‍थेत; मद्यपी, गर्दुल्ल्यांचा वावर
वाशी, ता. ५ (बातमीदार) : नवी मुंबई महापालिकेने पाच वर्षांपूर्वी ऐरोली नॉलेज पार्क परिसरात ५८ कोटी रुपयांच्या खर्चातून सिमेंटीकरण रस्ते आणि पादचारी पुलांची उभारणी केली. आयटी कंपन्यांमुळे हजारोंच्या संख्येने येणाऱ्या कर्मचाऱ्यांची सुरक्षितता लक्षात घेऊन पुलामध्ये उद्वाहकही बसवण्यात आले; मात्र ही यंत्रणा केवळ कागदावरच मर्यादित राहिल्याचे चित्र असून, सध्याच्या घडीला हे पादचारी पूल अक्षरशः निष्क्रिय अवस्थेत आहेत. पुलावर कायम अंधार असून मद्यपी, गर्दुल्ल्यांचा वावर वाढल्याने महिलावर्गात भीतीचे वातावरण आहे.
ऐरोली नॉलेज पार्क परिसरांमध्ये कॅपेजीमिनी, अ‍ॅक्सेस बॅक, माइंड स्पेससारख्या आयटी कंपन्या आहेत. या कंपन्यांमध्ये हजारोंच्या संख्येने कर्मचारी येतात. त्यामुळे या परिसरात पादचाऱ्यांसह वाहनचालकांची वर्दळ असते. येथील कर्मचाऱ्यांना ये-जा करण्यासाठी पादचारी पूल उभारण्यात आला आहे; मात्र त्‍याच्‍या देखभालीकडे दुर्लक्ष होत असल्याने त्‍याची दुरवस्‍था झाली आहे. या पुलावर कोणतीही विद्युत रोषणाई नसल्यामुळे रात्रीच्या वेळेस संपूर्ण परिसर अंधारात असतो. परिणामी, नागरिक पादचारी पुलाचा वापर टाळतात. त्‍यामुळे अंधाराचा फायदा घेत काही मद्यपींनी या पुलावर अड्डा जमवण्यास सुरुवात केली आहे. काही ठिकाणी मद्याच्या बाटल्यांचे ढीग आणि अस्वच्छता आढळते. नागरिकांनी अनेकदा तक्रार करूनही स्थानिक प्रशासन दुर्लक्ष करीत आहे. बीट मार्शल पोलिसदेखील मद्यपींकडून चिरीमिरी घेऊन दुर्लक्ष करीत असल्याचा आरोप नागरिकांनी केला आहे. पादचारी पुलाखाली राजकीय पाठबळाने उभारलेले बेकायदा पानटपऱ्यांचे अतिक्रमणही अडचणीचे ठरत आहे. याशिवाय, पादचारी पुलासाठी बसवलेले उद्वाहक आजतागायत कार्यरत झालेले नाहीत. परिणामी, वृद्ध, अपंग आणि महिलांना रस्ते ओलांडताना मोठा त्रास सहन करावा लागत आहे.
................
माजी स्थायी समिती सभापती नवीन गवते यांनी पालिका आयुक्तांना पत्र देत या परिस्थितीवर त्वरित उपाययोजना करण्याची मागणी केली आहे. शहर अभियंता शिरीष आरदवाड यांनी पुलांची पाहणी करून दुरुस्ती करण्यात येईल, असे सांगितले असले तरी प्रत्यक्ष कृतीचा अभाव नागरिकांच्या असंतोषाला कारणीभूत ठरतो आहे.