कुंडलिका नदीच्या पुलावरील संरक्षण कठड्यांची दुरुस्‍ती
अपघाताचा धोका टळला; वाहनचालकांसह नागरिकांना दिलासा
रोहा, ता. ६ (बातमीदार) ः जुलै महिन्यात आलेल्या पुरात कुंडलिका नदीच्या पुलावरील संरक्षक कठड्यांची दयनीय अवस्था झाली होती. पुराच्या पाण्यात काही संरक्षक कठडे आरसीसी फाउंडेशनसहित वाहून गेले होते. एकंदरीत पुलावर संरक्षक कठडे नसल्यामुळे नागरिकांत विशेषतः विद्यार्थीवर्गात भीती निर्माण झाली होती. मात्र सार्वजनिक बांधकाम विभागाच्या आदेशानुसार संबंधित ठेकेदाराने या संरक्षक कठड्यांची तातडीने दुरुस्ती केल्याने सर्वांनी सुटकेचा निःश्वास सोडला. दुसरीकडे अपघाताचा धोकादेखील टळला आहे.
मागील महिन्यात रोहे शहर व ग्रामीण भागाला मुसळधार पावसाने झोडपून काढले. सर्वाधिक पर्जन्यवृष्टीमुळे येथील कुंडलिका नदीला पूर आला होता. या पुरातील पाण्याच्या वेगवान प्रवाहात वाहून आलेल्या भल्या मोठ्या ओंढक्यामुळे पुलावरील संरक्षक कठडे मुळासकट उखडून उद्ध्वस्त झाले होते. त्याचप्रमाणे पुलाचीदेखील पार दुर्दशा झाली होती. संरक्षक कठडे तुटल्याने पुलावरून नागरिक, विद्यार्थी आणि वाहन चालक जीव मुठीत धरून ये-जा करित होते. त्‍यामुळे पुलाची पुन्हा दुरुस्ती व्हावी, अशी मागणी जनतेतून होत होती. या मागणीची रोहा सार्वजनिक बांधकाम विभागाकडून दखल घेण्यात आली. सणासुदीच्या दिवसात परगावातून पर्यटक मोठ्या प्रमाणात येत असतात. त्‍यामुळे पुलावर त्यांची गैरसोय होऊ नये अथवा कोणत्याही प्रकारची अप्रिय घटना घडू नये म्हणून पावसाने उसंती घेताच सार्वजनिक बांधकाम विभाग कामाला लागला. अधिकाऱ्यांच्या आदेशानुसार संबंधित ठेकेदाराने पुलाच्या दुरुस्तीच्या कामाला सुरुवात करून संरक्षक कठडे पुन्हा एकदा मजबूतपणे उभे केल्याने संभाव्य अपघाताचा धोका टळला आहे. पुलावर संरक्षक कठडे उभे राहिल्याने नागरिकांतून समाधान व्यक्त होत आहे.