आगीत बंद घरातील साहित्य खाक
सकाळ वृत्तसेवा
ठाणे, ता. ६ : घरगुती साहित्य स्टोअर करून ठेवलेल्या बंद घरात अचानक बुधवारी (ता. ६) मध्यरात्री सव्वा दोनच्या सुमारास शिळ गावात आग लागली. या घटनेत कोणतीही जिवीतहानी झाली नसली तरी घराचे मोठ्या प्रमाणात नुकसान झाले आहे. त्या आगीवर पाऊण तासात नियंत्रण मिळविण्यात ठाणे महापालिका अग्निशमन दलाच्या जवानांना यश आले आहे.
शिळ गावात गीताई अपार्टमेंट ही तळ अधिक पाच मजली इमारत आहे. त्या इमारतीच्या दुसऱ्या मजल्यावर रूम क्रमांक २०६ हा जयेश काटे यांच्या मालकी आहे. ते सध्याच्या घडीला घर बंद असल्याने त्यामध्ये कोणी राहत नाही. त्या रूममध्ये मध्यरात्री सव्वा दोनच्या सुमारास अचानक आग लागली. या घटनेची माहिती मिळताच घटनास्थळी अग्निशमन दलाच्या जवानांनी धाव घेत त्या आगीवर नियंत्रण मिळविण्यासाठी शर्थीचे प्रयत्न सुरू केल्यावर आग मध्यरात्री तीन वाजण्याच्या सुमारास पूर्णपणे नियंत्रणात यश आले. या घटनेत रूममधील टीव्ही, फ्रीज, लाकडी कपाट, लाकडी टेबल, इलेक्ट्रिक वायरिंग व इतर घरगुती साहित्य पूर्णपणे जळून नुकसान झाले आहे. ही शॉर्टसर्किटमुळे लागली असावी, असा प्राथमिक अंदाज वर्तविण्यात आला आहे. अशी माहिती ठाणे महापालिका आपत्ती व्यवस्थापन अधिकाऱ्यांनी दिली.