सहजानंद चौकातील वाहतूक बदल रद्द करा
माजी सभागृह नेते श्रेयस समेळ यांचा आंदोलनाचा इशारा

कल्याण, ता. ६ (वार्ताहर) : कल्याण पश्चिमेतील सहजानंद चौक परिसरात वाहतूक कोंडी सोडवण्यासाठी वाहतूक पोलिसांनी लागू केलेले नवे वाहतूक बदल तातडीने रद्द करावेत अन्यथा शिवसेना स्टाईलने आंदोलन करू, असा इशारा माजी सभागृह नेते श्रेयस समेळ यांनी दिला आहे.
वाहतूक विभागाने संतोषीमाता रोड आणि जैन सोसायटीकडे जाणाऱ्या मार्गांमध्ये एकेरी वाहतूक लागू केली असून, सहजानंद चौकात बॅरिकेटिंगही करण्यात आले आहे. मात्र या बदलांमुळे अंतर्गत भागात अधिकच कोंडी निर्माण होत असून, स्थानिक नागरिक त्रस्त झाले आहेत, असा आरोप समेळ यांनी केला. समेळ यांनी हे वाहतूक बदल म्हणजे रोगापेक्षा इलाज भयंकर असल्याचे सांगत नागरिकांना विनाकारण वेठीस धरले जात असल्याचा आरोप केला. वाहतूक पोलिस हे स्वतःची जबाबदारी झटकत असल्याचेही ते म्हणाले.
नव्या वाहतूक बदलांमुळे अंतर्गत भागात मोठी वाहतूक कोंडी होऊ लागली आहे. त्यामुळे बदल तातडीने रद्द करण्याची मागणी त्यांनी केली आहे. तसेच हे वाहतूक बदल म्हणजे नागरिकांना विनाकारण वेठीस धरण्याचा प्रकार असून, त्या माध्यमातून वाहतूक पोलिस केवळ आपली जबाबदारी झटकत असल्याचा आरोपही त्यांनी केला आहे. या नव्या बदलामुळे जैन सोसायटी, संतोषीमाता रोड परिसरात आता मोठी वाहतूक कोंडी होऊ लागली असून, स्थानिक नागरिक त्यामुळे प्रचंड हैराण झाले असल्याचेही समेळ यांनी सांगितले. ‘नवीन वाहतूक नियम तातडीने मागे घ्यावेत अन्यथा आम्हीच बॅरिकेटिंग हटवून आंदोलन करू, असा इशारा श्रेयस समेळ यांनी दिला आहे.

सुचवलेले पर्यायी उपाययोजना

काझी हॉस्पिटलजवळ बेतूरकर पाड्याकडे एकदिशा मार्ग
सहजानंद चौकात सिग्नल यंत्रणा बसवणे
तलावाकडे जाणाऱ्या मार्गावरील अनधिकृत पार्किंग हटवणे
अहिल्याबाई चौकातून सहजानंद चौकाकडे येणारी वाहतूक बंद करणे