माणगावात प्रलंबित महसूली अपिलांच्या तातडीची सुनावणी
माणगाव, ता. ६ (बातमीदार) : माणगावमध्ये ''महसूल लोक अदालत'' अंतर्गत प्रलंबित महसूली अपिलांच्या तातडीची सुनावणी होणार आहे. त्‍यामुळे प्रलंबित प्रकरणे निकाल निघण्यास मदत होणार आहे.
राज्यभरात महसूल प्रशासनाच्या विविध स्तरांवर तहसीलदार, मंडळ अधिकारी आणि उपविभागीय अधिकाऱ्यांच्या न्यायालयात प्रलंबित अपिल व दाव्यांची संख्या दिवसेंदिवस वाढत असून, याबाबत नागरिकांमध्ये तीव्र नाराजी आहे. या पार्श्वभूमीवर महाराष्ट्र राज्याचे महसूल मंत्री यांनी २३ जुलै २०२५ रोजी घेतलेल्या आढावा बैठकीत संबंधित अधिकाऱ्यांवर नाराजी व्यक्त करत, प्रलंबित प्रकरणांचा तातडीने निपटारा करण्याचे स्पष्ट निर्देश दिले. या आदेशाच्या अंमलबजावणीसाठी माणगाव प्रांताधिकारी डॉ. संदीपान सानप यांनी पत्रकार परिषद घेत महसूल लोक अदालतबाबत माहिती दिली. रायगडचे अपर जिल्हाधिकारी यांनी २९ जुलै २०२५ रोजी आदेश काढून माणगाव येथील उपविभागीय अधिकाऱ्यांच्या न्यायालयात ''महसूल लोक अदालत'' आयोजित करण्याचे निर्देश दिले आहेत. त्‍यानुसार लोक अदालती ११, १४, १८, २१, २५ व २८ ऑगस्ट या तारखांना सकाळी ११ ते दुपारी २ वाजेपर्यंत आयोजित करण्यात आल्याचे प्रांताधिकारी सानप यांनी सांगितले. यामध्ये माणगाव व तळा तालुक्यातील सर्व प्रलंबित महसूली अपिल व दाव्यांची सुनावणी जलदगतीने होणार आहे. यासाठी संबंधित पक्षकार, वकिल आणि नागरिकांना आवाहन करण्यात आले आहे की त्यांनी आपले म्हणणे लेखी स्वरूपात तयार ठेवून वेळेवर न्यायालयात उपस्थित राहावे. ''महसूल लोक अदालत'' उपक्रमाच्या माध्यमातून प्रलंबित प्रकरणांवर त्वरित व निष्पक्ष निर्णय देण्याचा शासनाचा प्रयत्न आहे. ही संधी नागरिकांनी आवर्जून घ्यावी, असे आवाहन महसूल प्रशासनातर्फे करण्यात आले आहे.