टेलिग्रामवर नोकरीच्या प्रलोभनाने ऑनलाइन गंडा
गोवा येथून मुख्य आरोपीस अटक
अंधेरी, ता. ६ (बातमीदार) ः टेलिग्रामवर नोकरीच्या प्रलोभनाने एका तरुणाची सुमारे सहा लाखांची ऑनलाइन फसवणूक केल्याप्रकरणी मुख्य आरोपीस गोवा येथून ओशिवरा पोलिसांनी अटक केली. अमन पास्कर परमार असे या २३ वर्षीय आरोपीचे नाव असून तो मध्य प्रदेशच्या इंदोरचा रहिवासी आहे. त्याला स्थानिक न्यायालयाने सोमवारपर्यंत पोलिस कोठडी सुनावली आहे.
यातील तक्रारदार जोगेश्वरी परिसरात राहतो. जून महिन्यांत तो त्याच्या घरी होता. या वेळी त्याला विजय नावाच्या एका व्यक्तीने कॉल करून टेलिग्रामवर नोकरीचे प्रलोभन दाखविले होते. घरबसल्या विविध रेस्ट्रॉरंटला रेटिंग देण्यास सांगून त्याला चांगले कमिशन देण्याचे आश्वासन देण्यात आले होते. त्यामुळे त्यांनी संबंधित लिंकवर विविध रेस्ट्रॉरंटला रेटिंग दिले होते, त्यात त्याला चांगले कमिशन मिळाले होते. त्यानंतर जास्त कमिशन देण्याचे गाजर दाखवून वेगवेगळ्या टास्कसाठी बँक खात्यात पैसे ट्रान्स्फर करण्यास प्रवृत्त करण्यात आले होते. त्यामुळे त्याने सहा लाख नऊ हजार रुपयांची गुंतवणूक करून त्याचे सर्व टास्क पूर्ण केले होते; मात्र ते टास्क पूर्ण करून त्याला मूळ रकमेसह कमिशनची रक्कम मिळाली नाही.
फसवणुकीचा हा प्रकार लक्षात येताच त्याने ओशिवरा पोलिसांत तक्रार केली होती. गुन्हा दाखल होताच पोलिसांनी आरोपीचा शोध सुरू केला होता. तांत्रिक माहितीवरून वरिष्ठ पोलिस निरीक्षक प्रितम बानावली, पोलिस निरीक्षक प्रभात मानकर यांच्या पथकातील पोलिस उपनिरीक्षक शरद देवरे, सहाय्यक फौजदार अशोक कोंडे, शिपाई विक्रम सरनोबत, स्वप्नील काकडे यांनी गोवा येथून अमर परमारला चौकशीसाठी ताब्यात घेतले होते. त्याच्याकडून पोलिसांनी एक मोबाईल, सिम कार्ड जप्त केले आहे. त्याच्या अटकेने टेलिग्रामवर नोकरीच्या प्रलोभनाने विविध टास्क देऊन फसवणुकीचे इतर काही गुन्हे उघडकीस येण्याची शक्यता वर्तविण्यात येत आहे.