आकर्षक राख्यांनी रोह्याची बाजारपेठ सजली
रक्षाबंधन सणाच्या पार्श्वभूमीवर उत्साह
रोहा, ता. ६ (बातमीदार) ः रक्षाबंधन अवघ्या काही दिवसांवर येऊन ठेपला असून, त्याच्या पार्श्वभूमीवर रोहा शहराची बाजारपेठ रंगीबेरंगी राख्यांनी सजली आहे. बहीण-भावाच्या प्रेमाचे प्रतीक मानला जाणारा रक्षाबंधन भारतात अत्यंत भावनिक व धार्मिक महत्त्व असलेला सण आहे. या सणाच्या निमित्ताने शहरातील दुकानांमध्ये विविध प्रकारच्या राख्यांची आकर्षक मांडणी करण्यात आली असून खरेदीसाठी महिला वर्गाचा चांगलाच ओढा पाहायला मिळत आहे.
बाजारात यंदा डायमंड डिझायनर, मुंबई स्टाइल, रेशीम वुलन गोंडा राखी, म्युझिक आणि लाइट राखी अशा विविध प्रकारच्या राख्या उपलब्ध आहेत. विशेषतः लहान मुलांसाठी कार्टून व खेळण्यांच्या स्वरूपातील राख्यांना अधिक मागणी आहे. या राख्यांची किंमत पाच ते शंभर रुपयांपर्यंत असून काही खास राख्या त्याहीपेक्षा महाग आहेत.
विक्रेते सांगतात, की यंदा राख्यांच्या किमतीत सुमारे पाच ते १० टक्के वाढ झाली असली तरी खरेदीदारांचा उत्साह मात्र कमी झालेला नाही. महिला विशेषतः बहिणी आपल्या लाडक्या भावासाठी हटके राखी घेण्यासाठी बाजारात गर्दी करीत आहेत.
स्थानिक राखीविक्रेते नारायण कान्हेकर यांनी सांगितले, की महागाई असूनही ग्राहकांचा उत्साह व प्रेम कायम आहे. यंदा डिझायनर राख्यांना विशेष मागणी आहे. ग्राहक ट्रेंड लक्षात घेऊन खरेदी करत आहेत.