जव्हार शहरातील रस्त्यांची दुरवस्था
पावसामुळे खड्डे पडल्याने वाहनचालक आणि विद्यार्थ्यांची कसरत
जव्हार, ता. ३ (बातमीदार) : स्वच्छ, सुंदर जव्हार शहरात विकासकामे करताना नियोजनाचा अभाव असल्याने कोट्यवधी रुपये खर्चून रस्ते बनविले जात आहेत, परंतु पावसामुळे रस्त्यावर जीवघेणे खड्डे पडले आहेत. यामुळे जव्हार शहरातील नागरिक पुरते हैराण झाले आहेत. वाहनचालक आणि विद्यार्थ्यांना शाळेत जाताना रोजच कसरत करावी लागत आहे. रस्त्यांची तत्काळ दुरुस्ती करण्याची मागणी येथील ग्रामस्थांनी केली आहे.
पालघर-डहाणू-मुंबई-नाशिक राज्य महामार्गापासून आश्रमशाळा आणि माध्यमिक शाळेसमोरून जव्हार गावात जाणारा मुख्य रस्ता खराब झाला आहे. रस्त्याची अवस्था अतिशय दयनीय झाली असून, खड्डे आणि चिखलाचे साम्राज्य पसरले आहे. या रस्त्यावरून विद्यार्थी, ग्रामस्थ यांची मोठ्या प्रमाणावर वर्दळ असते. गावातील दळणवळणासाठी मुख्य असणाऱ्या या रस्त्यावरून वाहनचालकांची वाहन चालवताना त्रेधातिरपीट उडत आहे. अनेकदा या रस्त्यांवर लहान-मोठे अपघातदेखील झाले आहेत. यामुळे संबंधित विभागाने लक्ष देऊन या रस्त्याची तातडीने दुरुस्ती करण्याची मागणी या परिसरातील ग्रामस्थांनी केली आहे.

जव्हार शहरात एसटी स्थानक परिसर, वन विभाग कार्यालय, पाचबत्ती, गोरवाडी, जांभूळ विहीर परिसर या भागांत रस्त्यावरील डांबर जणू कुणी चोरून नेले आहे की ठेकेदाराने रस्ता बनवताना डांबर वापरले नाही हेच कळत नाही. या ठिकाणच्या रस्त्याला पडलेल्या खड्ड्यांमुळे येथील जनजीवन विस्कळित झाले आहे.
- एकनाथ दरोडा, अध्यक्ष, सरपंच संघटना

रस्त्यांची अनेकदा डागडुजी
जव्हार नगर परिषद क्षेत्रातील रस्त्यांची अनेकदा डागडुजी केली आहे. परंतु या ठिकाणी पाऊस अधिक प्रमाणात पडतो. त्यामुळे रस्ते खराब होत असल्याची माहिती नगर परिषद प्रशासनाने दिली आहे.

फोटो कॅप्शन :
जव्हार ः वन विभाग कार्यालयासमोर रस्त्यावर खड्डे पडले आहेत.