अल्‍पवयीन विद्यार्थ्याला मारहाण
मालाड, ता. ६ (बातमीदार) ः खासगी शिकवणी घेणाऱ्या शिक्षकाने एका अल्‍पवयीन विद्यार्थ्याला मारहाण केल्‍याची घटना समोर आली आहे. याप्रकरणी मालवणी पोलिस ठाण्यात गुन्हा दाखल करण्यात आला आहे.
मोहम्मद अरहान (११) हा इयत्ता सहावीमध्ये शिकत असून, तो खासगी शिकवणी क्‍लासमध्ये जातो. तिथे सुजित आचार्य हा शिक्षक आहे. शनिवारी (ता. २) अरहान याला आणण्यासाठी त्‍याची आई क्‍लासमध्ये गेली असता, त्‍याने आपल्याला मारहाण केल्‍याचे सांगितले. तेव्हा आईला गाल, ओठ व इतर भागावर लालसर व्रण दिसून आले. घरी आल्‍यानंतर त्‍याची विचारपूस केली असता शिक्षकांनी काठीने मारहाण केली असल्‍याचे त्‍याने सांगितले. त्‍यानंतर अरहानला रुग्‍णालयात नेण्यात आले. सोमवारी (ता. ४) मालवणी पोलिसांनी गुन्हा नोंदवून पुढील तपास सुरू केला आहे.

आठवडाभरात दोन घटना
अवघ्या आठवडाभरात खासगी क्‍लासच्या शिक्षकांनी मुलांना मारहाण केल्‍याच्या दोन घटना उघडकीस आल्‍या आहेत. एक दिंडोशी पोलिस ठाण्याच्या हद्दीत आणि आता दुसरी मालवणीत अशी घटना घडली आहे. मालवणीमधील हा शिक्षक मालाड मीठ चौकी येथील एका नामांकित शाळेत शिक्षक म्हणूनही काम करतो.