प्लॅस्टिक वापर करणाऱ्यांना महापालिकेचा दणका
चार महिन्यात ९. ७५ लाख रुपयांचा दंड वसूल
वाशी, ता. ६ (बातमीदार) ः नवी मुंबई शहराला प्लॅस्टिकमुक्त बनवण्यासाठी नवी मुंबई महापालिकेने जोरदार मोहीम हाती घेतली आहे. आयुक्त डॉ. कैलास शिंदे यांच्या मार्गदर्शनाखाली चालविण्यात आलेल्या या मोहिमेमुळे गेल्या चार महिन्यांत तब्बल ९४६ किलो २५ ग्रॅम प्लॅस्टिक जप्त करण्यात आले असून १९४ दुकाने व आस्थापनांवर कारवाई करत ९ लाख ७५ हजार रुपयांचा दंड वसूल करण्यात आला आहे.
ही मोहीम १ एप्रिल ते ३१ जुलै दरम्यान विविध विभागांमार्फत राबवण्यात आली. परिमंडळ १ चे उपआयुक्त सोमनाथ पोटरे, परिमंडळ २ चे उपआयुक्त संजय शिंदे, डॉ. अजय गडदे (घनकचरा व्यवस्थापन), व स्मिता काळे यांच्या नेतृत्वाखाली कारवाई करण्यात आली. एकल वापर प्लॅस्टिकसह बंदी असलेल्या पिशव्या बाळगणाऱ्या दुकानदार व व्यावसायिकांवर ही कारवाई करण्यात आली.
पालिकेने सातत्याने प्लॅस्टिकविरोधी तपासणी मोहिमा सुरू ठेवण्याचा निर्धार केला असून, नागरिकांनी यामध्ये सक्रिय सहभाग घ्यावा असे आवाहन करण्यात आले आहे. विशेषतः दैनंदिन जीवनात प्लॅस्टिकचा वापर टाळून कापडी व पर्यायी पर्यावरणपूरक पिशव्यांचा अवलंब करावा, असा संदेश महापालिकेकडून देण्यात आला आहे.
...............
प्लॅस्टिकविरोधी जनजागृतीला चालना
डॉ. कैलास शिंदे यांनी स्पष्ट केले की, स्वच्छतेला अडथळा ठरणारे प्लॅस्टिक पर्यावरणासाठी देखील घातक आहे. त्यामुळे ''सफाई अपनाओ – बिमारी भगाओ'' या अभियानांतर्गत प्लॅस्टिकविरोधी जनजागृती व कारवाई या दोन्हींवर लक्ष केंद्रीत करण्यात आले आहे. नवी मुंबईकरांनी सुजाण नागरिकत्वाचे भान ठेवून एकल वापर प्लॅस्टिकपासून दूर राहावे, हीच अपेक्षा महापालिकेची आहे.